ރަށްރަށުގެ އާބާދީއާ ބަލައި، ކުނި މެނޭޖުކުރާ ސެންޓަރުތަކުގެ ފެންވަރު ރަނގަޅު ކުރުމުގެ މަސައްކަތް މި އަހަރު ފަށާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ގދ. ރަތަފަންދޫއަށް މިއަދު ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅުދައްކަވަމުން ރައީސް ވިދާޅުވީ ކުނީގެ މައްސަލަ ހައްލުކުރާނީ އެ ރަށެއްގެ އާބާދީ އާއި އެކަން ބޭނުންވެފައިވާ މިންވަރަށް ބަލައި، އެކަން ކުރަން ބޭނުންވާ ކެޕޭސިޓީގައި ކަމަށެވެ. އަދި އެ ރަށަށް ބޭނުންވާ ފެންވަރުގައި ހުރިހާ ކަމެއް ހަމަކުރެވިފައިވާ، ތަކެތީގެ ގޮތުންނާއި ވަސީލަތްތަކުގެ ގޮތުން ކަންތައް ފުރިހަމަ ކުރެވިފައިވާ ކުނި މެނޭޖުކުރުމުގެ މަރުކަޒެއް ރަތަފަންދޫގައި ގާއިމުކުރައްވާނެކަމަށް ރައީސް ވިދާޅުވިއެވެ.
މި އަހަރު ތެރޭގައި ރަތަފަންދޫއަށް ބޭނުންވާ ގިނަ ކަންކަން ފެށޭނެކަން ހާމަކުރައްވަމުން ރައީސް ވިދާޅުވީ އެކަންކަމަށް ސަރުކާރުން ވަރަށް ބޮޑު އިސްކަމެއް ދީގެން ކުރިއަށް ގެންދާނެކަމަށެވެ. އެގޮތުން އެރަށުގެ ގިރާ ސަރަހައްދު ހިމާޔަތް ކުރުމުގެ މަޝްރޫއުގެ މަސައްކަތް ކުރާއިރުރަށު ރައްޔިތުން މޫދަށް އެރިލާނެ ސަރަހައްދަކާއެކު ތަރައްގީ ކުރައްވާނެކަމަށް ރައީސް ވިދާޅުވިއެވެ.
މީގެ އިތުރަށް ރައީސް ވިދާޅުވީ ރަތަފަންދޫގައި، ސައުދީ ފަންޑުގެ އެހީގައި އައިސްޕްލާންޓުތައް ހަދާނެ ކަމަށާއި އެކަމާ ގުޅޭ މަޝްވަރާ ކުރަން އަންނަ ހަފުތާގައި ފިނޭންސް މިނިސްޓްރީން ބައްދަލުވުމެއް ބޭއްވުމަށް ހަމަޖެހިފައިވާ ކަމަށެވެ.
