ސަރުކާރުން ބައެއް ނިންމުންތައް ނިންމަން އުނދަގޫ ކަމަށާއި، ނަމަވެސް އެ ނިންމުންތައް ނިންމަނީ ރައްޔިތުންނަށް ދަތިކުރުމުގެ ނިޔަތުގައި ނޫން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ހުވަދޫ އަތޮޅުގެ ރަށްތަކަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން ގދ. ވާދު އަށް ވަޑައިގެން އެ ރަށު ރައްޔިތުންނާ ބައްދަލުކުރައްވައި ރައީސް ވިދާޅުވީ، ސަރުކާރާއި އާންމުން ގުޅިގެން މަސައްކަތްކޮށް ތަރައްގީ ހަގީގަތަކަށް ހެދުމަށްޓަކައި މި އަހަރު އަޒުމް ކަނޑައަޅަން ޖެހޭ ކަމަށެވެ.
ތަރައްގީއަކީ ވަރަށް ފުޅާ އެއްޗެއް ކަމަށާއި، އެއީ ހަމައެކަނި އުމްރާނީ މަޝްރޫއުތަކެއް ނޫންކަން ރައީސް ފާހަގަކުރެއްވިއެވެ.
"އެ ކަންކަން ވެސް ކުރަމުން އަޅުގަނޑުމެންގެ ސިކުނޑި ތަރައްގީކޮށް އަޅުގަނޑުމެންގެ އަހްލާގު އެގޮތުން ރަނގަޅުކޮށް ދަރިން ހެޔޮގޮތުގަ ތަރުބިއްޔަތުކޮށް އަޅުގަނޑުމެންގެ މުޖުތަމައަކީ ހެޔޮ ކަންކަމަށް އަމުރުކޮށް ނުބައި ކަންކަން ނަހީކުރާ މުޖުތަމައެއް ގޮތުގަ ބަދަލުކުރުން، އެއީ ވަށާ ޖެހޭ ތަރައްގީއަކީ،" އެމަނިކުފާނު ވިދާޅުވިއެވެ.
ރައީސް ވިދާޅުވީ މުޖުތަމައުގައި ހިނގާ ނުރަނގަޅު ކަންކަމަށް ނޫނެކޭ ބުނުމުގެ ހިތްވަރު ހުންނަން ޖެހޭނެ ކަމަށާއި، ޒަމާންތަކެއް ވަންދެން ކަމެއް ގޯސްކޮށް ހިނގައިދިއުމަކީ އެގޮތަށް ދޫކޮށްލައިގެން ތިބެން ވާނެ ކަމެއްނޫން ކަމަށެވެ.
ސަރުކާރުން ބައެއް ނިންމުންތައް ނިންމުން އުނދަގޫކަން ފާހަގަކުރައްވައި ރައީސް ވިދާޅުވީ ބައެއް ނިންމުންތައް ސަރުކާރުން ނިންމަނީ ކުރިއަށް އޮތް މުސްތަގްބަލަށްޓަކައި އަންނަން ހުރި ޖީލުތައް ސަލާމަތްކޮށްދީ ހަގީގީ މާނައިގައި ތަރައްގީވެފައިވާ ގައުމަކަށް ރާއްޖެ ހެދުމަށް ކަމަށާއި، އަށަގެންފައިވާ ގޯސް ބައެއް އާދަތައް ނައްތާލުމުގެ ނިޔަތުގައި ކަމަށެވެ.
މި ބައްދަލުކުރެއްވުމުގައި ރައީސް ވަނީ ވާދު އަށް ކޮށްދެއްވާނެ ބައެއް ކަންކަން ވެސް ހިއްސާކުރައްވައިފައެވެ. އޭގެ ތެރޭގައި ހިމެނެނީ:
- ވާދޫ ސްކޫލަށް ދިވެހި ޓީޗަރަކު ހޯދައިދިނުން
- އެ ރަށު ސްކޫލްގެ ޖާގަ އިތުރުކުރުމުގެ މަސައްކަތް ފެށުން
- ވާދޫގެ މުހިންމު މަގުތައް ތަރައްގީކުރުން
- އެ ރަށު ސިއްހީ މަރުކަޒުން ދޭ ހިދުމަތްތަކުގެ ފެންވަރު ރަނގަޅުކުރުން
