އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންހް އަވަހާރަވުމާ ގުޅިގެން، ރައީސް ޑރ. މުހައްމަދު މުއިއްޒު ތައުޒިޔާ ވިދާޅުވެއްޖެއެވެ.
2004 ވަނަ އަހަރުން 2014 ވަނަ އަހަރަށް އިންޑިއާގެ ބޮޑުވަޒީރުކަން ކުރެއްވި މަންމޯހަން ސިންހް އުމުރުފުޅުން 92 އަހަރުގައި އަވަހާރަވީ ސިއްހީ ހާލުކޮޅު ގޯސްވެ، އިންޑިއާގެ އިންސްޓިޓިއުޓް އޮފް މެޑިކަލް ސައިންސް (އެއިމްސް) ހޮސްޕިޓަލުގައި ފަރުވާ ހޯއްދަވަމުން ދަނިކޮށެވެ.
މަންމޯހަން ސިންހްގެ އާއިލާއަށާއި އިންޑިއާގެ ރައްޔިތުންނަށް ތައުޒިޔާ ދަންނަވައި 'އެކްސް'ގައި ރައީސް ލިޔުއްވިގޮތުގައި، ދެކުނު އޭޝިއާ ސަރަހައްދުގެ ގައުމުތަކުގެ އެއްބާރުލުމާއި ތަރައްގީގައި މަންމޯހަން ސިންހް މުހިންމު ދައުރެއް އަދާކުރައްވާފައިވެއެވެ.
"ޑރ. މަންމޯހަން ސިންހް ނޮވެމްބަރު 2011 ގައި ދިވެހިރާއްޖެއަށް ކުރެއްވި ތާރީހީ ދަތުރުފުޅަކީ ދިވެހިރާއްޖޭގެ އިގްތިސޯދީ އަދި އިޖުތިމާއީ ތަރައްގީގައި މުހިންމު ދައުރެއް އަދާކުރި ދަތުރުފުޅެއް،" އެމަނިކުފާނު ލިޔުއްވާފައި ވެއެވެ.
އިންޑިއާގެ މިހާރުގެ ބޮޑުވަޒީރު ނަރެންދްރާ މޯދީ 'އެކްސް'ގައި ލިޔުއްވިގޮތުގައި ޑރ. މަންމޯހަން ސިންހް ވަނީ އިންޑިއާގެ މާލީ ވަޒީރުކަން ކުރެއްވި ދުވަސްވަރު އެ ގައުމުގެ މާލީ ސިޔާސަތުތައް ކަނޑައެޅުއްވުމުގައި މުހިންމު ދައުރެއް އަދާކުރައްވައިފައެވެ. ހަމަ އެއާއެކު އިންޑިއާ ރައްޔިތުންގެ ދިރިއުޅުމަށް ހެޔޮ ބަދަލުތައް ގެނައުމަށްޓަކައި މަންމޯހަން ސިންހް މަސައްކަތްކުރެއްވި ކަމަށް ވެސް މޯދީ ލިޔުއްވާފައިވެއެވެ.
