ކ. ގުރައިދޫއިން ނިޔާވި 4 މަހުގެ ކުއްޖާގެ ހަށިގަނޑު އޮޓޮޕްސީ ހަދަން އިންޑިއާއަށް ފޮނުވައިފިއެވެ.
ފުލުހުން ބުނީ މި ކުއްޖާގެ ހަށިގަނޑު މިއަދު މެންދުރު 12 ގެ ފްލައިޓުގައި އިންޑިއާއަށް ގެންގޮސްފައިވާ ކަަމަށާއި، މި ކުއްޖާ ނިޔާވި މައްސަލަ ފުލުހުންނަށް ރިޕޯޓުކޮށްފައިވަނީ ޑިސެމްބަރު 14 ވަނަ ދުވަހު ކަމަށެވެ.
މިކަމާ ގުޅިގެން ކ. ގުރައިދޫގެ ކައުންސިލް މެމްބަރު އިބްރާހިމް ޝަލީޒް "ދަ ޕްރެސް" އަށް މައުލޫމާތު ދެއްވަމުން ވިދާޅުވީ އެރޭ ދަންވަރު 12:30 ހާއިރު ކުއްޖާގެ ހަބަރު ހުސްވެފައި އޮތުމުން އެރަށުގެ ސިއްހީ މަރުކަޒަށް ގެންދެވުނު ކަމަށެވެ. އެ ރަށު ސިއްހީ މަރުކަޒާ ހަވާލާދީ ޝަލީޒް ވިދާޅުވީ އެ ކުއްޖާ ސިއްހީ މަރުކަޒަށް ގެންދިޔަ އިރުވެސް ނިޔާވެފައިވާކަމަށެވެ.
ޝަލީޒް އިތުރަށް ވިދާޅުވީ އެ ވަގުތު ކައުންސިލް މެމްބަރުންވެސް ސިއްހީ މަރުކަޒަށް ދިޔަކަމަށާއި، ދެން މަސައްކަތް ފެށީ ކުއްޖާގެ ކަށުކަމާކެމީގެ ކަންކަން ކުރުމަށް ކަމަށެވެ. ނަމަވެސް އެރޭ ދަންވަރު 3 ހާއިރު ފުލުހުންގެ ލޯންޗެއް އެރަށަށް އައި ކަމަށާއި ފުލުހުން ކުއްޖާގެ ހަށިގަނޑު މާލެ ގެންދަން ޖެހޭކަމަށް ބުނި ކަމަށެވެ.
ކުއްޖާގެ ބޭރުފުށުން އެއްވެސް އަނިޔާއެއް ލިބިފައިވާކަން ފާހަގަކުރެވެން ނެތް ނަމަވެސް ކުއްޖާގެ ނޭފަތުން ލޭ އައިސްފައިވާކަމަށް އެރަށު ސިއްހީ މަރުކަޒާ ހަވާލާދީ ޝަލީޒް ވަނީ ވިދާޅުވެފައެވެ.
