މާލޭގެ ކެފޭއަކަށް ވަދެ އެތަނުގެ މުވައްޒަފުންނަށް ބިރު ދެއްކި މައްސަލައާއި ގުޅިގެން ދެ މީހަކު ހައްޔަރުކޮށް ބަންދުގެ މުއްދަތު ޖަހައިފިއެވެ.
ފުލުހުން ބުނީ މި މަހުގެ 12 ވަނަ ދުވަހު ހަވީރީ ހިނގުމުގައި ހުންނަ ލެޓްސް ކޮފީ މޯލްޑިވްސް އަށް ބަޔަކު ވަދެ ތޫނު ހަތިޔާރު ބޭނުންކޮށްގެން އެ ތަނުގެ މުވައްޒަފުންނަށް ބިރު ދައްކާ މުދަލަށް ގެއްލުން ދީފައިވާކަމަށެވެ.
މި މައްސަލަ އާއި ގުޅިގެން މި މަހުގެ 16 ވަނަ ދުވަހު ކޯޓު އަމުރެއްގެ ދށުން ގއ.ދެއްވަދޫ، ވައިލެޓްމާގެ އަހްމަދު ތައުފީގު (31އ) އަދި ބ.ތުޅާދޫ މީޒާން އަސަދުﷲ ހާތިމް (44އ) ހައްޔަރުކޮށްފައިވާކަމަށް ފުލުހުން ވަނީ ބުނެފައެވެ،
އިތުރަށް ފުލުހުން ބުނީ މި ދެމީހުންގެ ބަންދާއި މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ބަންދަށް 5 ދުވަސް ޖަހާފައިވާކަމަށެވެ.
މި މައްސަލަ ފުލުހުން ދަނީ އިތުރަށް ތަހުގީގުކުރަމުންނެވެ.
