ރާއްޖޭގައި އަރިދަފުސް ރޯގާ ޖެހިގެން ރިޕޯޓުކުރި އަދަދު އާދަޔާ ހިލާފަށް އިތުރުވަމުން އަންނަ ކަމަށް ހެލްތު ޕްރޮޓެކްޝަންސް އެޖެންސީ (އެޗްޕީއޭ) ގެ ތަފާސްހިސާބުތަކުން ދައްކައިފިއެވެ.
އެޗްޕީއޭ އިން އާންމުކުރާ ތަފާސްހިސާބުތަކަށް ބަލާއިރު، މިދިޔަ އޮކްޓޫބަރު މަހު 29،515 މީހަކު އަރިދަފުސް ރޯގާ ޖެހިގެން ރިޕޯޓްކޮށްފައިވާ އިރު، ނޮވެމްބަރު މަހު ވަނީ 40،504 މީހަކު ރިޕޯޓްކޮށްފައި ކަމަށެވެ. އެއާއެކު އަރިދަފުސް ރޯގާ ޖެހިގެން އެ ދެމަސް ދުވަހު ތެރޭގައި 70،019 މީހަކު މި ވަނީ ރިޕޯޓްކޮށްފައެވެ. މިއީ މިދިޔަ އަހަރުގެ މި މުއްދަތުގައި އަރިދަފުސް ރޯގާ ޖެހިގެން ރިޕޯޓުކުރި އަދަދާ އަޅާބަލާއިރު އިތުރު އަދަދެކެވެ.
އެޗްޕީއޭ އިން މިއަދު ބުނީ މި އަހަރުގެ އޮކްޓޫބަރު މަހާ އަޅާބަލާ އިރު، އިންފުލުއެންޒާގެ އަލާމާތްތައް ހުރެގެން ޓެސްޓް ކުރި މީހުންގެ އަދަދު ވެސް ވަނީ ނޮވެމްބަރު މަހު އިތުރުވެފައި ކަމަށެވެ. މި އަހަރުގެ މިހާތަނަށް 2،375 ޓެސްޓް ކުރިއިރު އޭގެ ތެރެއިން 476 ސާމްޕަލް ޕޮޒިޓިވްވެފައިވާ ކަމަށް އެޗްޕީއޭއިން ބުނެއެވެ.
ޑެންގީ ހުމުގެ ތަފާސްހިސާބަށް ބަލާއިރު އޮކްޓޫބަރު މަހަށް ވުރެ ނޮވެމްބަރު މަހު ޑެންގީ ޖެހުނު މީހުންގެ އަދަދު ވެސް އިތުރެވެ. އޮކްޓޫބަރު މަހު 126 ޑެންގީ ކޭސް ރިޕޯޓުކޮށްފައިވާ އިރު ނޮވެމްބަރު މަހުގެ އަދަދަކީ 140 އެވެ. އެކަމަކު މިއީ މިދިޔަ އަހަރުގެ މިހާތަނާ އަޅާބަލާއިރު ދަށް އަދަދެކެވެ.
ބޭރަށް ހިންގާ ރޯގާއެއް ވެސް މިދުވަސްވަރު އަންނަނީ ފެތުރެމުން ކަމަށް އެޗްޕީއޭއިން ބުނެއެވެ. މިދިޔަ އޮކްޓޫބަރު މަހު 3،164 ކޭސް ފެނިފައިވާ އިރު ނޮވެމްބަރު މަހު 3،635 ކޭސް ރިޕޯޓުކޮށްފައިވާ ކަމަށް އެޗްޕީއޭ އިން ބުނެއެވެ.
އާންމު ބަލިތައް ފެތުރޭ އަދަދު މި ދުވަސްވަރު އިތުރުވަމުންދާތީ އެޗްޕީއޭ އިން ވަނީ ބަލިތަކުން ރައްކާތެރިވުމަށް ފިޔަވަޅުތައް އަޅަން ވެސް އިލްތިމާސް ކޮށްފައެވެ.
މި ބަލިތަކަށް ރައްކާތެރިވުމަށް އެޗްޕީއޭއިން އިލްތިމާސްކޮށްފައިވާއިރު ބޮޑު ޗުއްޓީއަށް މާލެ ކައިރި ރަށްރަށުގެ އިތުރުން، ރާއްޖޭގެ ހުރިހާ ހިސާބަކަށް މީހުން ދަތުރުކުރާނެއެވެ. އަދި ޗުއްޓީގައި އަތޮޅުތަކަށް ދާ މީހުންގެ އިތުރުން ރާއްޖެއިން ބޭރަށް ވެސް އެތައް ބަޔަކު އާންމުކޮށް ދަތުރު ކުރާއިރު، މިފަދަ ބަލިތަކުން ރައްކާތެރިވުމަށް ސަމާލުކަން ދިނުމަކީ މުހިއްމު ކަމެކެވެ. އާންމުކޮށް ޗުއްޓީ ދުވަސްވަރު ރޯގާތައް ފެތުރޭ މިންވަރު އިތުވާ ކަން ވަނީ ފާހަގަވެފައެވެ.
