މިދިޔަ ނޮވެމްބަރު މަހު އަރިދަފުސް ރޯގާގެ އިތުރުން އެހެނިހެން ބަލިތަށްވެސް އިތުރުވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނެފިއެވެ.

އެޗްޕީއޭ އިން މިއަދު އާންމު ކުރި ތަފާސް ހިސާބުތަށް ދައްކާ ގޮތުން މި ހިނގާ އަހަރުގެ އޮކްޓޯބަރު މަހު ޑެންގީ ޖެހިގެން ރިޕޯޓުކޮށްފައި ވަނީ 126 ކޭސްއެވެ. ނަމަވެސް ހުސްވި ނޮވެމްބަރު މަހު ވަނީ އެ އަދަދު 140 އަށް އިތުރުވެފައެވެ.

ހަމައެހެންމެ މިދިޔަ އޮކްޓޯބަރު މަހާ އަޅާ ބަލާއިރު އަރިދަފުސް ރޯގާ ޖެހޭ މިންވަރުވެސް ވަނީ އިތުރުވެފައެވެ. އެގޮތުން އޮކްޓޯބަރު މަހު އަރިދަފުސް ރޯގާގެ 25،515 ކޭސްއެއް ރިޕޯޓުކޮށްފައިވާއިރު ނޮވެމްބަރު މަހު ވަނީ އެ އަދަދު 40،504 އަކަށް އިތުރުވެފައެވެ. އެހެންކަމުން ކޮވިޑް އަދިއިންފްލުއެންޒާ ފަދަ ރޯގާތަކުން ރައްކާތެރިވުމުގެ ފިޔަވަޅުތައްއެޅުމަކީ މުހިންމުކަމެއް ކަމަށް އެޗްޕީއޭއިން ވަނީ ލަފާދީަފއެވެ.

އިންފުލުއެންޒާ ރިޕޯޓުކޮށްފައިވާ މިންވަރު:

  • މިއަހަރުގެ އޮކްޓޯބަރު މަހު ޓެސްޓު ކުރި އަދަދު: 67 - ޕޮޒިޓިވް ވި އަދަދު: 12
  • މިއަހަރުގެ ނޮވެމްބަރު މަހު ޓެސްޓު ކުރި އަދަދު: 164 - ޕޮޒިޓިވް ވި އަދަދު: 42
  • މިއަހަރު މިހާތަނަށް ޓެސްޓް ކުރެވުނު އަދަދު: 2،325
  • މިއަހަރު މިހާތަނަށް ޕޮސިޓިވް ވީ އަދަދު: 4

އެހެން ރޯގާ ތަކެކޭ އެއްފަދައިން ބޭރަށް ހިންގުންވެސް ވަނީ އޮކްޓޯބރު މަހާ އަޅާ ބަލާއިރު އިތުރުވެފައެވެ. އެގޮތުން އޮކްޓޯބަރު މަހު ޖުމްލަ 3،164 ކޭސް ރިޕޯޓު ކޮށްފައިވާއިރު ނޮވެމްބަރު މަހު ބޭރަށް ހިންގުން ޖެހިގެން 3،635 ކޭސް ވަނީ ރިޕޯޓުކޮށްފައެވެ.

އެޗްޕީއޭއިން ވަނީ މިފަދަ ބަލިތަކުން ރައްކާތެރިވެ ތިބުމަށް އިލްތިމާސްކޮށްފައެވެ. މިގޮތުން ރޯގާ ޖެހިއްޖެނަމަ ކެއްސާ ކިނބިހި އަޅާއިރު އަނގަޔާ ނޭފަތް ނިވާކުރުމާއި މީހުން އެއްވެ އުޅޭތަންތަނަށް ނުދިޔުމަށްވަނީ އިލްތިމާސްކޮށްފައެވެ އަދި އާއްމު ސާފުތާހިރުކަމަށް ސައިބޯނިލައިގެން އަތްދޮވުމަށް އިސްކަންދިނުމުގެ އިތުރުން މިފަދަ ބަލިތަކުން ސަލާމަތްވުމަށް ގޭގައި ދެވެން ހުންނަ ފަރުވާތައް ހޯދުމަށް އެޗްޕީއޭއިން އިލްތިމާސްކުރެއެވެ.

ހަމައެއާއެކު ހުން އައިސް ކެއްސާނަމަ މީހުން އެއްވެ އުޅޭ ތަންތަނަށް ނުދިއުމަށް ވެސް އެޗްޕީއޭއިން އިސްތިމާސް ކުރެ އެވެ.