ކ. ގުރައިދޫއިން ނިޔާވި 4 މަހުގެ ކުއްޖާގެ ހަށިގަނޑު އޮޓޮޕްސީ ހަދަން ނިންމައިފިއެވެ.
މީޑިއާތަކަށް މައުލޫމާތު ދެމުން ފުލުހުން ބުނީ ގުރައިދޫގައި 4 މަހުގެ ތުއްތު ކުއްޖަކު ނިޔާވި މައްސަލަ މިއަދު ފުލުހުންނަށް ރިޕޯޓުކޮށްފައިވާކަމަށާއި، އެ ކުއްޖާގެ ހަށިގަނޑު އޮޓޮޕްސީ ހެދުމަށް ރާއްޖެއިން ބޭރަށް ފޮނުވުމަށް ހަމަޖެހިފައިވާ ކަމަށެވެ.
މިކަމާ ގުޅިގެން ކ. ގުރައިދޫގެ ކައުންސިލް މެމްބަރު އިބްރާހިމް ޝަލީޒް "ދަ ޕްރެސް" އަށް މައުލޫމާތު ދެއްވަމުން ވިދާޅުވީ ރޭ ދަންވަރު 12:30 ހާއިރު ކުއްޖާގެ ހަބަރު ހުސްވެފައި އޮތުމުން އެރަށުގެ ސިއްހީ މަރުކަޒަށް ގެންދެވުނު ކަމަށެވެ. އެ ރަށު ސިއްހީ މަރުކަޒާ ހަވާލާދީ ޝަލީޒް ވިދާޅުވީ އެ ކުއްޖާ ސިއްހީ މަރުކަޒަށް ގެންދިޔަ އިރުވެސް ނިޔާވެފައިވާކަމަށެވެ.
ޝަލީޒް އިތުރަށް ވިދާޅުވީ އެ ވަގުތު ކައުންސިލް މެމްބަރުންވެސް ސިއްހީ މަރުކަޒަށް ދިޔަކަމަށާއި، ދެން މަސައްކަތް ފެށީ ކުއްޖާގެ ކަށުކަމާކެމީގެ ކަންކަން ކުރުމަށް ކަމަށެވެ. ނަމަވެސް ރޭ ދަންވަރު 3 ހާއިރު ފުލުހުންގެ ލޯންޗެއް އެރަށަށް އައި ކަމަށާއި ފުލުހުން ކުއްޖާގެ ހަށިގަނޑު މާލެ ގެންދަން ޖެހޭކަމަށް ބުނި ކަމަށެވެ.
ކުއްޖާގެ ބޭރުފުށުން އެއްވެސް އަނިޔާއެއް ލިބިފައިވާކަން ފާހަގަކުރެވެން ނެތް ނަމަވެސް ކުއްޖާގެ ނޭފަތުން ލޭ އައިސްފައިވާކަމަށް އެރަށު ސިއްހީ މަރުކަޒާ ހަވާލާދީ ޝަލީޒް ވަނީ ވިދާޅުވެފައެވެ. ޝަލީޒް އިތުރަށް ވިދާޅުވީ ކުއްޖާގެ ހަށިގަނޑު މިވަގުތު އޮތީ މޯޗަރީގައި ކަމަށެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
