އިއްޔެ ހިނގި އަލިފާނުގެ ހާދިސާ އާ ގުޅިގެން ގެއްލުންވި ތިން މިނިސްޓްރީގެ މަސައްކަތްތައް ވަގުތީގޮތުން ދަރުބާރުގެ އަށް ބަދަލުކުރުމުގެ މަސައްކަތްތައް ފަށައިފިއެވެ.
އިއްޔެ ހެނދުނު 6:30 ހާއިރު ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީ އާއި މާލެ ސިޓީ ކައުންސިލްގެ ރަޖިސްޓްރޭޝަނާ ބެހޭ ބައި ހުންނަ ގްރީން ބިލްޑިން ކޮމްޕްލެކްސްގައި ރޯވެ، އެ ތަން ވަނީ ބޭނުންނުކުރެވޭ ވަރަށް އެއްކޮށް އަނދައި ހުލިވެފައެވެ.
އަލިފާންގަނޑު އެއްކޮށް ނިވާލެވުނީ ހާދިސާ ހިނގިތާ ހަތަރު ގަޑިއިރު ވީ ފަހުންނެވެ.
މި ހާދިސާ އަށް ފަހު ތިން މިނިސްޓްރީގެ މަސައްކަތްތައް ދަރުބާރުގެ އަށް ބަދަލުކުރުމުގައި ސްޓެލްކޯ އާއި އެމްޑަބްލިއުއެސްސީގެ އިތުރުން ސަރުކާރުގެ އެހެނިހެން ކުންފުނިތަކުން ގެންދަނީ މަސައްކަތްކުރަމުންނެވެ. މާލެ ސިޓީ ކައުންސިލުން ވަނީ ރަޖިސްޓްރޭޝަންގެ މަސައްކަތްތައް ހުޅުމާލޭގައި ހުންނަ އެ ތަނުގެ އޮފީހަށް ބަދަލުކޮށްފައެވެ.
ދަރުބާރުގެ އިމާރާތްކޮށްފައި ވަނީ މީގެ 34 އަހަރުކުރިން ރާއްޖޭގައި ބޭއްވި ފަސްވަނަ ސާކް ސަމިޓަށެވެ. އޭގެ ފަހުން ސަރުކާރާއި އަމިއްލަ އެތައް ހަފްލާއެއް ބޭއްވުމަށް ދަރުބާރުގެ ބޭނުންކޮށްފައިވެއެވެ. އެކަމަކު މިފަހުން އެ ތަން ބޭނުންކޮށްފައި ވަނީ ކޮވިޑް-19 އާ ގުޅޭ ކަންކަމުގެ އިތުރުން، މިދިޔަ ރިޔާސީ އިންތިހާބުގައި އިލެކްޝަންސް ކޮމިޝަންގެ މައި މަރުކަޒުގެ ގޮތުގައެވެ.
