މަސްކިރާތާ 48 ގަޑިއިރު ތެރޭ އޮޑިވެރިންނަށް ފައިސާ ޖަމާކޮށްދޭން ފަށާނެ ކަމަށް ރައީސް ޑރ. މުހައްމަދު މުއިއްޒު ވެވަޑައިގެންނެވި ވައުދުފުޅާ އެއްގޮތަށް، މިފްކޯއަށް ކިރި މަހުގެ ފައިސާ ޖަމާކޮށްދީފިއެވެ.
ފިޝަރީޒް މިނިސްޓަރު އަހުމަދު ޝިޔާމް އެކްސްގައި ކުރެއްވި ޕޯސްޓެއްގައި ވިދާޅުވީ މިދިޔަ އާދިއްތަ ދުވަހު މަސްވެރިން ކިރި މަހަށްވާ 2،045،823.37 ރުފިޔާ މިއަދު މިފްކޯއިން މަސްވެރިންނަށް ޖަމާކޮށްފައި ވާކަމަށާއި، މިއީ ފުރަތަމަ ފަހަރަށް 48 ގަޑިއިރުތެރޭ މަސްވެެރިންގެ ފައިސާ ޖަމާކުރެވުނު ތާރީހީ ދުވަހެއް ކަމަށެވެ.
ރައީސްއަށް ފަށްފަށުން ޝުކުރު ދަންނަވަމުން ޝިޔާމް ވިދާޅުވީ މަސްވެރި ސިނާއަތުގައި ހުރި ޒަމާންވީ ބޮޑެތި ގޮންޖެހުންތަކަށް ރައީސް މުއިއްޒު ގެންދަވަނީ ޖުމްލަ ހައްލުތަކެއް ހޯއްދަވައި ދެއްވަމުން ކަމަށެވެ.
އަތޮޅުގެ ރަށްތަކަށް މިހާރު ކުރައްވަމުންގެންދާ ދަތުރުފުޅުގެ ތެރެއިން އިއްޔެ ހެނދުނު ކ. ގާފަރަށް ވަޑައިން އެ ރަށު ރައްޔިތުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ، މަސްވެރިކަމުގެ ސިނާއަތަކީ މި ސަރުކާރުން ވަރަށް ބޮޑު އިސްކަމެއް ދީގެން ކުރިއަރުވަން މަސައްކަތް ކުރަމުންދާ ސިނާއަތެއް ކަމަށާއި، ސަރުކާރު ހިންގުމާ ހަވާލުވެވަޑައިގެންނެވި އިރު އޮޑިވެރިންނަށް ދޭންޖެހޭ 225 އެއްހާ މިލިއަން ރުފިޔާ ހުރިކަމަށެވެ.
ރައީސް ވިދާޅުވީ އެ ފައިސާ ދައްކާ ހަލާސްކޮށްފައިވާ ކަމަށާއި މިހާތަނަށް ތެލުގެ ސަބްސިޑީ ހިމަނައިގެން އޮޑިވެރިންނަށް 100 މިލިއަނެއްހާ ފައިސާ ދައްކާފައިވާ ކަމަށެވެ. ނަމަވެސް އެއީ ވައުދުވެވަޑައިގެންނެވި ގޮތް ނޫންކަން ފާހަގަ ކުރައްވާ ރައީސް ވިދާޅުވީ މަސްކިރާތާ 48 ގަޑިއިރު ތެރޭގައި މަހުގެ ހަމަ އަގު މަސްވެރިންނަށް ދިނުމަކީ އެމަނިކުފާނު ވެވަޑައިގެންނެވި ވައުދުފުޅު ކަމަށެވެ.
އިސްލާމިކް ބޭންކް (އެމްއައިބީ) ގައި އެކައުންޓް ހުޅުވާފައި ހުރި މަސް ދޯނިތަކަށް 48 ގަޑިއިރު ތެރޭ ފައިސާ ޖަމާނުވިނަމަވެސް އެ ފަރާތްތަކަށް އިތުރު ގޮތްތައް ހޯދުމުގެ މަސައްކަތް ކުރަމުންދާ ކަމަށްވެސް ރައީސް ވަނީ ވިދާޅުވެފައެވެ.
