އިންޑިއާގެ ބޭ އޮފް ބެންގަލްގައި އުފެދިފައިވާ ކޮޅިގަނޑާ އެއްކޮށް ރާއްޖޭގެ ވައި ނުސާފުވެފައިވާއިރު، ވައި ނުފާސުވާ ވަގުތުތަކުގައި ރައްކާތެރިކަމުގެ ފިޔަވަޅު އެޅުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އިލްތިމާސްކޮށްފިއެވެ.
އެޗްޕީއޭއިން ބުނީ އައިކިޔުއެއާ އެޕުން ދައްކާ ގޮތުގައި، އެންމެ ބޮޑަށް ވައި ތައައްޔަރުވެފައި ވަނީ ވިލިމާލެއަށެވެ. އެގޮތުން ވައިގެ ތައައްޔަރުކަން ބަލާ މިންގަނޑުން އެ ރަށުގައި އުޅެނީ 94ގައެވެ. މާލެއަށް 82ގައި އުޅޭއިރު، ށ.ފުނަދޫއަށް އުޅެނީ 55ގައެވެ.
އެޗްޕީއޭއިން ވަނީ ވައި ނުސާފުވާ ގަޑިތަކުގައި ރައްކާތެރިކަމުގެ ފިޔަވަޅުތައް އަޅަން އެދިފައެވެ. މިގޮތުން، އެޅިދާނެ ފިޔަވަޅުތަކުގެ ތެރޭގައި:
- ފުއްޕާމޭގެ ބަލިތަކާ ހިތުގެ ބަލިތަކާއި އެލާޖީ މައްސަލަތައް ހުންނަ މީހުން ގެއިން ބޭރުގައި ގިނަ ވަގުތު ހޭދަނުކުރުން
- ބޭރަށް ނިކުންނަން ޖެހޭ ހާލަތުގައި މާސްކު އެޅުން
- ކުޑަކުދިންނާއި ދޮށީ އުމުރުގެ މީހުންނާއި މާބަނޑު މީހުން ގިނަ ވަގުތު ބޭރުގައި ނޫޅުން
- ތުއްތު ކުދިން ބޭރަށް ނުނެރުންގޭގެ ދޮރުތައް ލައްޕާފައި ބެހެއްޓުން
- ބޭރުގައި ކުޅިވަރު ކުޅުމާއި ކަސްރަތު ކުރުން ފަދަ ކަންކަން މަޑު ޖައްސާލުން
އެޗްޕީއޭއިން އާންމުކޮށްފައިވާ މިންގަނޑުތަކަށް ބަލާއިރު، ވައިގެ ނުސާފުކަން ހުރުން ރަނގަޅީ 0-50 އާ ދެމެދުގެ ރޭންޖެއްގައެވެ. އަދި، އެ މިންގަނޑުގެ ތެރޭގައި ވައިގެ ނުސާފުކަން ހުރިނަމަ، އެއިން އެއްވެސް ނުރައްކަލެއް ނެތް ކަމަށް ބުނެފައިވެއެވެ. ރާއްޖޭގެ ބައެއް ހިސާބުތަކުގެ ވައިގެ މިންގަނޑު މިހާރު ހުރި މިންވަރަށް ބަލާއިރު ނޭވާލާ ނިޒާމުގެ މައްސަލަ ޖެހުމުގެ ފުރުސަތު ބޮޑެވެ.
