މަސްވެރިންނަށް ނުދެވި ހުރި ފައިސާ، މަސްވެރިންނަށް ރައްދުކުރުމަށް އެ ފައިސާ މިފްކޯއާ ހަވާލުކޮށްފައިވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިފަދައިން ވިދާޅުވެފައި ވަނީ މިއަދު އެކްސްގައި ކުރެއްވި ޕޯސްޓެއްގައެވެ.
ރައީސް ވިދާޅުވީ މިއަދާ ހަމައަށް މަސްވެރިންނަށް ނުދެވި ހުރި ފައިސާ އެ ފަރާތްތަކަށް ރައްދުކުރުމަށް މިފްކޯއަށް ހަވާލުކޮށްފައިވާ ކަމަށެވެ. އަދި މެނިފެސްޓޯގައިވާ ފަދައިން 48 ގަޑި އިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ގާއިމު ކުރުމުގެ މަސައްކަތް ކުރަމުންދާ ކަމަށް ވެސް ރައީސް ވަނީ ވިދާޅުވެފައެވެ.
މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި ފިޝަރީޒް މިނިސްޓަރު އަހްމަދު ޝިޔާމް ވިދާޅުވީ މަސްވެރިންނަށް ދޭންޖެހޭ ފައިސާގެ ތެރެއިން މިހާރު ނުދެވި ހުރީ 16،220،00 ރުފިޔާ ކަމަށެވެ. އަދި މާދަމާ އެ ފައިސާ މަސްވެރިންނަށް ދެވޭނެ ކަމަށް މިނިސްޓަރު ވިދާޅުވިއެވެ.
ނިމިދިޔަ ސަރުކާރުން މަހުގެ އަގު 17 ރުފިޔާއިން 25 ރުފިޔާއަށް ބޮޑުކޮށްފައި ވަނީ މަހުގެ އަގު އެއްވެސް ދިރާސާއެއް ކުރުމެއް ނެތި ކަަމަށް ޝިޔާމް ވަނީ ވިދާޅުވެފައެވެ. އަދި މި ސަރުކާރު ވެރިކަމަށް އައިއިރު، މަސްވެރިންނަށް ދޭންޖެހޭ 250 މިލިއަން ރުފިޔާގެ ބެކްލޮގްއެއް އޮތް ކަމަށް ވެސް ޝިޔާމް ވިދާޅުވިއެވެ.
