ރައީސުލްޖޫމްހޫރިއްޔާ ޑރ. މުހަންމަދު މުއިއްޒު މިހާރު އިންޑިއާއަށް ކުރައްވަމުން ގެންދަވާ ދަތުރުފުޅުގައި މަހާތުމާ ގާންދީގެ މަގުބަރާ އަށް ޒިޔާރަތްކުރައްވައިފިއެވެ.
އިންޑިއާގެ މިނިވަންކަމުގެ ބާނީ، މަހާތުމާ ގާންދީގެ މަގުބަރާ ބިނާކޮށްފައިވަނީ އެ ގައުމުގެ ރަޖްގަތް މެމޯރިއަލްގައެވެ. އެ މެމޯރިއަލް އަށް ވަޑައިގެން، މަގުބަރާ އަށް ޒިޔާރަތްކުރެއްވުމަށް ފަހު، ރައީސް ވަނީ މެމޯރިއަލް ފޮތުގައި ސޮއިކުރައްވާފައިވެ އެވެ. އަދި އެ ގައުމުން ވަނީ އެމަނިކުފާނަށް މަހާތުމާ ގާންދީގެ ބަޔޮގްރަފީ އެއްވެސް ހަދިޔާކުރައްވާފައެވެ.
ރައީސް މުއިއްޒުއަށް މަރުހަބާ ކިޔުމުގެ ރަސްމިއްޔާތު، މިއަދު ހެނދުނު އިންޑިޔާގެ ރިޔާސީ ގަނޑުވަރު، ރާޝްތުރަޕަތީ ބަވަންގައި ބާއްވާފައިވާއިރު އެ ގައުމާއެކު ދިވެހި ސަރުކާރުން ރަސްމީ ބައްދަލުވުންތައް ފެށުމަށް ހަމަޖެހިފައިވަނީ މިއަދުއެވެ.
މި މަހުގެ 06 ވަނަ ދުވަހުން ފެށިގެން 10 ވަނަ ދުވަހަށް، ރައީސް މުއިއްޒު އިންޑިއާއަށް ކުރައްވާ ދަތުރުފުޅަކީ އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ކުރައްވާ ދަތުރުފުޅެކެވެ. ރައީސްގެ މި ދަތުރުފުޅުގައި އިންޑިއާގެ ރައީސް ދުރޫޕަދީ މުރުމޫ، އިންޑިއާގެ ބޮޑު ވަޒީރު ނަރެންދްރަ މޯދީ، އަދި އެ ގައުމުގެ އިސް ވެރިންނާ ބައްދަލުކުރެއްވުމަށް ވަނީ ހަމަޖެހިފައެވެ.
