އެހެން ގައުމުތަކާ އެކު ބާއްވާ ގުޅުމެއްގެ ސަބަބުން އިންޑިޔާގެ ސަލާމަތާއި ރައްކާތެރި ކަމަށް ބުރޫއަރާ ފަދަ އެއްވެސް ކަމެއް ރާއްޖެއިން ނުކުރާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވެފައި ވަނީ އިންޑިއާއަށް ކުރައްވާ ފުރަތަމަ ރަސްމީ ދަތުރުފުޅުގައި "ދަ ޓައިމްސް އޮފް އިންޑިއާ" އަށް ދެއްވި ހާއްސަ އިންޓަވިއުއެއްގައެވެ.
އިންޑިއާގެ ބޮޑުވަޒީރު ނަރެންދުރަ މޯދީއާ މިއަދު ބައްދަލުކުރެއްވުމުގެ ކުރިން ޗައިނާއާ އެކު އޮންނަ ގުޅުން އިތުރަށް ބަދަހިވަމުންދާތީ އެކަމުގެ ކަންބޮޑުވުންތަކާ ގުޅިގެން ކުރި ސުވާލުތަކަށް ޖަވާބު ދެއްވަމުން މުއިއްޒު ވިދާޅުވީ، އެކި ދާއިރާތަކުން އެހެން ގައުމުތަކާ އެކު ގުޅުން ބަދަހިކުރަމުން އަންނަ އިރު، އެ ގައުމުގެ އަމަލުތަކުގެ ސަބަބުން ސަރަހައްދުގެ ސަލާމަތާއި ހަމަޖެހުމަށް ބުރޫނާރާނެ ކަން ކަށަވަރު ކުރުމަށް މަސައްކަތް ކުރަމުން އަންނަ ކަމަށެވެ.
އިންޑިއާއަކީ ރާއްޖޭގެ އަގުހުރި ބައިވެރިއެއް އަދި ރަހުމަތްތެރިއެއް ކަމަށާއި އެ ގުޅުން ބިނާވެފައި ވަނީ ދެ ގައުމުގެ މެދުގައި އޮންނަ އިހުތިރާމާއި ހިއްސާވާ މަސްލަހަތުގެ މައްޗަށް ކަމަށް ރައީސް މުއިއްޒު ފާހަގަ ކުރެއްވިއެވެ. އަދި އިންޑިއާއާއެކު ރާއްޖެއިން ބަދަހި އަދި ސްޓްރެޓެޖިކް ގުޅުމެއް ބާއްވަމުން ގެންދާނެ ކަމަށާއި ސަރަހައްދީ ހަމަޖެހުން ގާއިމުކުރުމަށް ގުޅިގެން މަސައްކަތް ކުރާނެ ކަމަށް ވެސް އެމަނިކުފާނު ވިދާޅުވިއެވެ. ހަމައެއާއެކު އިންޑިއާއާ އެކު އޮތް ޒަމާންވީ އަދި އިތުބާރު ކުރެވޭ ގުޅުމަށް އިސްކަން ދެއްވާނެ ކަމަށް ވެސް ރައީސް ވިދާޅުވިއެވެ.
އެހެން ގައުމުތަކާ އެކު ބާއްވާ ގުޅުންތަކުގެ ސަބަބުން އިންޑިއާގެ ސަލާމަތީ މަސްލަހަތަށް އުނިކަމެއް ނާންނާނެ ކަމުގެ ޔަގީންކަން އެބައޮތް، ކަމަސް ރައިސް ވިދާޅުވިއެވެ. ރާއްޖެއާއި އިންޑިއާއާ ދެމެދު މިހާރު އޮތީ އެކަކު އަނެކަކުގެ ކަންބޮޑުވުންތައް ރަނގަޅަށް ދެނެގަނެވިފައި ކަމަށާއި ދިފާއީ އެއްބާރުލުމަކީ އަބަދުވެސް އިސްކަންދޭނެ ކަމެއް ކަމަށް ރައީސް މުއިއްޒު ވިދާޅުވިއެވެ.
ރާއްޖޭގައި ތިބި އިންޑިއާ ސިފައިން ބޭރުކުރުމާ ގުޅޭ ގޮތުން ވާހަކަ ދައްކަވަމުން މުއިއްޒު ވިދާޅުވީ، އެއީ ދިވެހިން ބޭނުންވި ގޮތް ކަމަށެވެ. އަދި މި ފަހުން ދެ ގައުމުގެ ދެމެދުގައި ހިންގަމުން އަންނަ ކަންތައްތަކަށް ބަލާއިރު، ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމަށް ރައީސް ވިދާޅުވިއެވެ. މި ފުރަތަމަ ރަސްމީ ދަތުރުފުޅު ނިމޭއިރު މަސައްކަތް ކުރަނީ އެއްބާރުލުންދީ، ދެ ގައުމުގެ ދެމެދުގައި ފައިދާ ހުރި ޕާޓްނާޝިޕެއް ގާއިމް ކުރުމަށް ކަމަށް ރައިސް ވިދާޅުވިއެވެ.
