އިންޓަނޭޝަނަލް އިންޑިއަން ފިލްމު އެކެޑަމީ (އައިފާ) އެވޯޑުގެ އެންމެ މޮޅު އެކްޓަރުގެ އެވޯޑު ކުޅަދާނަ ތަރި ޝާހްރުކް ހާނަށް ލިބި، އެންމެ މޮޅު ބަތަލާގެ އެވޯޑު ރާނީ މުކަރްޖީ އަށް ލިބިއްޖެއެވެ.
ބޮލީވުޑްގެ ރަސްގެފާނުގެ ނަމުން ނަން މަޝްހޫރު އެކްޓަރު ޝާހްރުކަށް އެންމެ މޮޅު އެކްޓަރުގެ އެވޯޑު ލިބުނީ މިދިޔަ އަހަރު ރިލީޒްކުރި "ޖަވާން" އިންނެވެ. ގިނަ ބަޔަކު އިއްތިފާގުވާގޮތުގައި ޖަވާން އަކީ ފަހުގެ ތާރީހެއްގައި ޝާހު ކުޅުނު އެންމެ ވަރުގަދަ ފިލްމެވެ. އަދި އޭނާގެ އެންމެ މޮޅު އެކްޓިން ފެނިގެންދިޔަ ފިލްމުވެސްމެއެވެ. މި ފިލްމުގައި ޝާހު ވަނީ ތަފާތު ތިން ލުކް އަކުން ފެނިގެން ގޮސްފައެވެ. އެއީ ތަލަ މީހެއްގެ ސިފައިގެ އިތުރުން ވަރުގަދަ ސިފައިން ފަހުލަވާނެއްގެ ސިފައިގައެވެ. އަދި ވަރަށް އާދައިގެ މެދުފަންތީގެ މީހެއްގެ ރޯލުން ވެސް ޝާހު ފެނިގެންދިޔައެވެ.
އެންމެ މޮޅު ބަތަލާގެ އެވޯޑު ރާނީ ހޯދީ އޭނާ ކުޅުނު ފިލްމު "މިސިޒް ޗެޓަޖީ ވާސަސް ނޯވޭ" ގައި އޭނާ އަދާކުރި އެކްޓިންނަށެވެ. ނޯވޭ ގައި ދިރިއުޅެމުން އަންނަ އިންޑިއާގެ ދެމަފިރިންގެ ވާހަކަ ކިޔައިދޭ މި ފިލްމުން ދައްކުވައިދޭނީ ނޯވޭ ގެ ސަރުކާރުން އިންޑިއާ މަންމަ އަށް ލިބުނު ދެދަރިން ސަރުކާރުން ނަގައި، ދަރިންތައް ހޯދުމަށް މަންމަ ކުރާ ބުރަ މަސައްކަތެވެ.
އައިފާ އެވޯޑްސްގެ އެންމެ މޮޅު ފިލްމަކަށް ހޮވުނީ ރަންބީރު ކަޕޫރުގެ "އެނިމަލް" އެވެ. އެންމެ މޮޅު ސަޕޯޓިން އެކްޓަރުގެ ރޯލު ފިލްމު "އެނިމަލް" އިން އަނިލް ކަޕޫރަށް ލިބުނުއިރު އެންމެ މޮޅު ސަޕޯޓިން ބަތަލާގެ ރޯލު ލިބުނީ ފިލްމު "ރޮކީ އޯރް ރާނީ" އިން ޝަބާނާ އަޒްމީއަށެވެ. އެންމެ މޮޅު ނެގަޓިވް ރޯލު ލިބުނީ "އެނިމަލް" ގައި ބޮބީ ޑިއޯލް ކުޅުނު ކެރެކްޓާއަށެވެ.
