މި ހިނގާ 2024 ވަނަ އަހަރުގެ ފުރަތަމަ 8 މަސް ދުވަހު ޖުމްލަ 282 މިލިއަން ރުފިޔާގެ މަސްތުވާތަކެއްޗާއި ބަނގުރާ އަތުލައިގަނެފައިވާ ކަމަށް ފުލުހުން ބުނެފިއެވެ.
މި އަހަރުގެ 1 ޖެނުއަރީން ހުސްވި އޮގަސްޓު މަހުގެ 31 ވަނަ ދުވަހުގެ ނިޔަލަށް ފުލުހުންގެ ޑްރަގް އެންފޯސްމަންޓްއިން ކޮށްފައިވާ މަސައްކަތްތަކުގެ ތަފާސް ހިސާބުތައް މިއަދު ވަނީ އާންމު ކޮށްފައެވެ.
އެގޮތުން އެފަދަ މައްސަލަތަކުގައި 8554 މީހުން ބަލާ ފާސްކޮށްފައިވާއިރު 712 މީހުން ވަނީ ހައްޔަރުކޮށްފައެވެ. މަސްތުވާތަކެއްޗާއި ދެކޮޅަށް ޖުމްލަ 113 އޮޕަރޭޝަނެއް ފުލުހުންގެ ޑްރަގް އެންފޯސްމަންޓްއިން ހިންގާފައިވާއިރު 80 ބިދޭސީން ވަނީ އިމިގްރޭޝަނާއި ހަވާލުކޮށްފައެވެ.
އަދި އެކިއެކި އޮޕަރޭޝަންތަކުގައި 158.84 ކިލޯގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސްފައިވާއިރު އަތުލެވުނު މަސްތުވާތަކެއްޗާއި ބަނގުރަލުގެ އަދަދު 282،273،651.52 މިލިއަނަށް އަރާ ކަމަށް އެ ތަފާސް ހިސާބުތަކުން ހާމަވެއެވެ. މީގެ އިތުރުންވެސް ފުލުހުންގެ ޑްރަގް އެންފޯސްމެންޓަށް ޖުމްލަ 475 މައްސަލަ ހުށަހަޅާފައިވާއިރު ތަހުގީގު ނިންމާ ދައުވާ ކުރުމަށް 230 މައްސަލައެއް ވަނީ ޕީޖީ އަށް ފޮނުވާފަައިވާ ކަމަށް އެ ހިދުމަތުން މައުލޫމާތު ދިނެވެ.
ރާއްޖެއަށް މަސްތުވާތަކެތި އެތެރެކޮށް ވިއްކާ މީހުންގެ އަދަދު ދުވަހެއް ދުވަހަކަށް އިތުރުވަމުންނެވެ. އޭގެ ތެރޭގައި ތަފާތު ނުރައްކާ ބާވަތްތަކުގެ މަސްތުވާތަކެތިވެސް ހިމެނެއެވެ.
އެގޮތުން މަސްތުވާތަކެތީގެ ނުރައްކާތެރި ބާވަތެއް ކަމަށްވާ "ފެންޓަނީލް-ލޭސްޑް ޑްރަގްސް" ނުވަތަ އާއްމު ނަމުން ނަމަ "ޗައިނާ ވައިޓް' ޑްރަގް ވެސް މި އަހަރު ކުރީކޮޅު ވަނީ އާންމުވެފައެވެ. ހެރޮއިންގެ ބަދަލުގައި ބޭނުންކުރާ މި މަސްތުވާތަކެއްޗަކީ ހެރޮއިން އަށް ވުރެ 20-40 ގުނަ އަދި މޯފިން އަށް ވުރެ 100 ގުނަ ބާރުގަދަ ބާވަތެކެވެ.
މިފަދަ މައްސަލަތައް އާނމްުވެފައިވާއިރު މަސްތުވާތަކެއްޗާއި ދެކޮޅަށް ފުލުހުންނާއި ކަމާ ގުޅުންހުރި އިދާރާތަކުން ދަނީ ހާއްސަ މަސައްކަތްތަކެއްވެސް ކުރަމުންނެވެ. އެގޮތުން ދާދި ފަހުން ވަނީ ފުލުހުންގެ ހިދުމަތާއި މޯލްޑިވްސް ކަސްޓަމް ސާވިސް އަދި މޯލްޑިވްސް އެއާޕޯޓްސް ކޮމްޕެނީ ގުޅިގެން ވެލާނާ އެއާޕޯޓުގައި ފުލުހުންގެ ޑޯގް ސްކޮޑް ނެރެ އޮޕަރޭޝަނެއް ފަށާފައެވެ.
