ބުޅާ މަސް އަޅައިގެން ކާތަކެތި ތައްޔާރުކޮށް، ވިއްކި ބަންގްލަދޭޝް މީހާ ހައްޔަރުކޮށް މައްސަލަ ބަލަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ ބުޅާ މަސް އަޅައިގެން ކާތަކެތި ތައްޔާރުކުރި ކަމަށް ތުހުމަތު ކުރެވޭ މައްސަލަ އިއްޔެގެ ވަގުތެއްގައި ހުށަހަޅާފައިވާ ކަމަށެވެ. އަދި މި މައްސަލަ ތަހުގީގު ކުރަމުންދާ ކަމަށެވެ.
މި މައްސަލާގައި ތުހުމަތު ކުރެވެނީ އުމުރުން 32 އަހަރުގެ އަރްފަތު ހުސައިން ނަމަކަށް ކިޔާ ބަންގްލަދޭޝް ފިރިހެނެއްގެ މައްޗަށެވެ.
އިމިގްރޭޝަނަށް ހާޒިރުވުމަށް އަންގާ އިއްޔެ އިމިގްރޭޝަނުން އޭނާގެ ވަނަވަރު އާންމުކޮށްފައި ވާއިރު، އިމިގްރޭޝަނަށް ހާޒިރުވުމަށް ނެރެފައިވާ ނޯޓިސްގައި އެމީހާ ހޯދަނީ ކޮން ސަބަބަކާ ހުރެ ކަން ބުނެފައެއް ނުވެއެވެ. ބަންދު ނޫން ކޮންމެ ދުވަހެއްގެ ހެނދުނު 8 އިން ހަވީރު 4 އާ ދެމެދު މަޖީދީ މަގުގައި ހުންނަ މ. ސްޓާ ކްލައުޑް ބިލްޑިންގެ، 10 ވަނަ ފަންގިފިލާގެ ރިސްކް މެނޭޖްމަންތް ސެކްޝަން އަށް ހާޒިރުވުމަށް އިމިގްރޭޝަނުން އެ ނޯޓިސްގައި ބުނެފައިވެއެވެ.
އެ މީހާ އާ ބެހޭ މައުލޫމާތާއި އޭނާ އުޅޭ ތަނެއް އިނގޭ ނަމަ އިމިގްރޭޝަންގެ ނަންބަރު 9199017 އަށް ގުޅައި އެންގުމަށް ވެސް ވަނީ ބުނެފައެވެ. އީމެއިލް އިން އަންގާނަމަ ރިސްކް މެނޭޖްމަންޓް ސެކްޝަންގެ އީމެއިލް އަށް މެއިލް ކުރުމަށް އިމިގްރޭޝަނުން ބުނެއެވެ.
ފެލިން ވެލްފެއާ އޯގަނައިޒޭޝަން ނަމުގައި އެކްސްގައި ހަދާފައިވާ އެކައުންޓަކުން އެމީހާގެ ވަނަވަރު އާންމުކޮށް ވަނީ އޭނާއަކީ ގަވައިދާ ހިލާފަށް އުޅޭ ބިދޭސީއެއް ކަމަށާއި އޭނާ އަންނަނީ ބުޅާ މަސް އަޅައިގެން ކާތަކެތި އުފައްދަމުން ކަމަށް ބުނެފައެވެ.
