ދިރާސާއަކީ އިންސާނީ ކުރިއެރުމުގެ މައިގަނޑު ބާރު ކަމަށާއި އެއީ ތަރައްގީ އަދި ކުރިއެރުމުގެ ބިންގާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ މިއަދު ހެނދުނު ދިވެހިރާއްޖޭގެ ގައުމީ ޔުނިވާސިޓީގައި ބޭއްވި ތެވެލި އިންޓަނޭޝަނަލް ކޮންފަރެންސްގައި ވާހަކަފުޅު ދައްކަވަމުންނެވެ.
ދިރާސާއަކީ އިންސާނީ ކުރިއެރުމުގެ މައިގަނޑު ބާރުކަން ފާހަގަ ކުރައްވާ ރައީސް ވިދާޅުވީ ދިރާސާގެ ސަބަބުން ދުނިޔެ ބައްޓަންކޮށް، ކުރިއެރުންތަކަށް ބާރުލިބޭ ކަމަށެވެ. ދިރާސާ ނުކުރާނަމަ ތަރައްގީ އާއި ކުރިއެރުންތައް ހުއްޓިގެންދާނެ ކަމަށް ރައީސް ވިދާޅުވިއެވެ.
ދުނިޔެއަށް ކުރިމަތިވެފައިވާ ގޮންޖެހުންތައް އިތުރަށް ބޮޑުވެފައި ވާއިރު، ދިރާސާގެ ދައުރު މިހާރު ކުރިއަށްވުރެ މުހިންމުވެފައިވާ ކަމަށް ރައީސް ވިދާޅުވިއެވެ. އެގޮތުން މޫސުމަށް އަންނަ ބަދަލުތަކުގެ އަސަރުތަކާ ކުރިމަތިލުމާއި، ދެމެހެއްޓެނިވި ޓެކްނޮލޮޖީތައް ތަރައްގީ ކުރުން، ނުވަތަ އާންމު ސިއްހަތުގެ ނިޒާމުތައް ރަނގަޅު ކުރުމަށް ވެސް ދިރާސާގެ މުހިންމުކަން ރައީސް ފާހަގަ ކުރެއްވިއެވެ.
ރައީސް ވިދާޅުވީ ސިޔާސަތުތައް އެކުލަވާލުމުގައި ދިރާސާކުރުމަކީ ވަރަށް މުހިންމު ކަމެއް ކަމަށެވެ. އެއީ ހަރުދަނާ އާންމު ސިޔާސަތުތައް އެކުލަވާލުމަށް އެހީތެރިވެދޭ ތަޖުރިބާގެ މައްޗަށް ބިނާކޮށްފައިވާ ހެކިތަކުގެ އަސާސެއް ފޯރުކޮށްދޭތީ ކަމަށާއި ދުނިޔޭގެ ގޮންޖެހުންތަކަށް އާ އަދި ހެކީގެ މައްޗަށް ބިނާކޮށްފައިވާ ހައްލުތައް ހުށަހަޅައި ދެވޭތީ ކަމަށް އެމަނިކުފާނު ވިދާޅުވިއެވެ.
ދިރާސާކުރުމަކީ ހަމައެކަނި މައުލޫމާތު އެއްކުރުމެއް ނޫން ކަމަށާއި އެއީ މުޖުތަމައުގެ އަދި އިގްތިސޯދީ ކުރިއެރުމަށް ބޭނުންކުރެވޭ ވަރުގަދަ ވަސީލަތެއްކަން ރައީސްގެ ވާހަކަފުޅުގައި ފާހަގަ ކުރެއްވެވިއެވެ. އަދި ގައުމެއްގެ ގައުމީ ތަރައްގީގައި ގިނަ ދާއިރާތަކުގެ ދިރާސާތަކުގެ ދައުރު މުހިންމު ކަމަށް ވިދާޅުވިއެވެ. މިކަމުގެ ސަބަބެއްގެ ގޮތުގައި ރައީސް ފާހަގަ ކުރެއްވީ އާ އީޖާދުތައް ކުރުމަށާއި މުޖުތަމައުގެ އުނދަގޫ މައްސަލަތަކަށް ހައްލު ހޯދުމަށް މަގުފަހިވުމެވެ.
ސަރުކާރުގެ ސިޔާސަތުތައް ހެކީގެ މައްޗަށް ބިނާކުރުމަށް މި ސަރުކާރުން މުހިންމު ފިޔަވަޅުތަކެއް އަޅާފައިވާކަން ރައީސް ފާހަގަ ކުރެއްވިއެވެ. އެގޮތުން ރިސާޗް ކައުންސިލެއް އުފެއްދުމާއި ތިމާވެށީގެ ދެމެހެއްޓެނިވިކަމާއި، އިގްތިސޯދީ ތަރައްގީއާއި، އިޖްތިމާއީ ދުޅަހެޔޮކަމުގެ ދާއިރާތަކުގައި ދިރާސާ ގްރާންޓްތައް ތައާރަފު ކޮށްފައި ވާކަން ރައީސް ވަނީ ފާހަގަ ކުރައްވާފައެވެ.
މީގެ އިތުރުން، ދިރާސާކުރާ ފަރާތްތަކާއި ސިޔާސަތު އެކުލަވާލާ ފަރާތްތަކާ ދެމެދު އޮންނަ ގުޅުން ބަދަހިކުރުމަށްޓަކައި އެކި ނިޒާމުތައް ތައާރަފް ކުރުމަށް މަސައްކަތް ކުރަމުންދާ ކަމަށް ރައީސް ވިދާޅުވިއެވެ. އަދި އެއާއެކު ސިޔާސަތުތައް އެކުލަވާލުމުގެ މަރުހަލާގައި ދިރާސާތައް އަމަލީގޮތުން ބޭނުން ކުރެވޭކަން ކަށަވަރު ކުރެވި، ދިވެހިރާއްޖޭގައި ކުރިއަރަމުންދާ ދިރާސާތަކުގެ މައްޗަށް ބިނާކޮށް ނިންމުންތައް ނިންމުމުގެ ސަގާފަތެއް އުފެދިގެންދާނެ ކަމަށް ރައީސް ވަނީ ވިދާޅުވެފައެވެ.
