ހެރޮއިން އަދި ބޮގަރު ކަމަށް ޝައްކުކުރެވޭ ތަކެއްޗާއެކު ދެ މީހަކު ހައްޔަރުކޮށްފިއެވެ.
ފުލުހުން ބުނީ ލ. ގަން، ތުނޑި، ވިލެޖް ގޭގައި މަސްތުވާތަކެތި ގެންގުޅެ ވިޔަފާރި ކުރާ ކަމަށް ފުލުހުންގެ އިންޓެލިޖެންސް އަށް އޮގަސްޓު 16 ވަނަ ދުވަހު ލިބުނު މައުލޫމާތާ ގުޅިގެން ކޯޓު އަމުރެއްގެ ދަށުން އެ ގެ ބަލާ ފާސްކުރެވުނު ކަމަށެވެ.
ފުލުހުން ބުނީ އެ ގެ ބަލާ ފާސް ކުރުމުގެ ތެރެއިން އެ ގޭން 24.42 ގުރާމްގެ ހެރޮއިން ކަމަށް ޝައްކުކުރެވޭ މަސްތުވާތަކެއްޗާއި ބޮގަރު ކަމަށް ޝައްކުކުރެވޭ 2 ރުނބާ އަދި 5 ލީޓަރުގެ ފުޅިޔެއްގެ އިތުރުން ބޮގަރު ކައްކަން ބޭނުން ކުރާ ތަކެތި ފެނިފައިވާ ކަމަށެވެ.
މި މައްސަލަ އާއި ގުޅިގެން ދިވެހި ދެ ފިރިހެނުން ހައްޔަރުކޮށްފައިވާ ކަމަށާއި އެއީ 42 އަހަރުގެ އަދި 57 އަހަރުގެ މީހުން ކަމަށް ފުލުހުން މައުލޫމާތު ދެއެވެ. މީގެއިތުރުން ފުލުހުން ބުނީ މި މައްސަލަ އިތުރަށް ތަހުގީގު ކުރަމުން ދާ ކަމަށެވެ.
މަސްތުވާތަކެތީގެ މައްސަލަ ހައްލު ކުރުމަށް ދިވެހިރާއްޖެއަށް މަސްތުވާތަކެތި އެތެރެކުރާ މީހުންނަށް މަރުގެ އަދަބު ދެވޭ ގޮތަށް މަސްތުވާތަކެތީގެ ގާނޫނު އިސްލާހު ކުރަން ހޯމް ލޭންޑް މިނިސްޓްރީން ވަނީ ބިލެއްވެސް އެކުލަލާލާފައެވެ. ދާދި ފަހުން އެކުލަވާލި މި ބިލް އެޓާނީ ޖެނެރަލްގެ އޮފީހަށް ފޮނުވަން ތައްޔާރުވަމުން އަންނަ އިރު ޑްރަގް މައްސަލަތަކުގައި ރާއްޖޭގައި މަރުގެ އަދަބު ދޭން ހުށަހެޅި މިއީ ފުރަތަމަ ފަހަރެވެ.
ބިލުގައި ވާގޮތުން ޖަދުވަލު 1 ގައިވާ މަސްތުވާއެއްޗެއް ވަކި އަދަދަކަށް ވުރެ ގިނައިން އެތެރެކޮށްފި ނަމަ މަރުގެ އަދަބު ދެވޭނެއެވެ.
