ރާއްޖެއަށް މިހާރު ކުރަމުންދާ ވިއްސާރައިގައި އާންމު ރައްޔިތުންގެ ދިރިއުޅުމުގެ ހާލަތަށް ބުރޫ އަރާފައި ވާތީ، ވިއްސާރައާ ގުޅިގެން ކުރިމަތިވަމުންދާ ކަންކަން މޮނިޓާކޮށް ރައްޔިތުންނަށް ކުރިމަތިވާ ކަންކަމަށް އަވަސް ހައްލު ހޯދައި ދިނުމަށްޓަކައި ރައީސުލްޖުމްހޫރިއްޔާ ހާއްސަ ޓާސްކް ފޯސްއެއް އުފައްދަވައިފިއެވެ.
މި ޓާސްކްފޯސް ޗެއާ ކުރައްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުއެވެ.
މި ޓަސްކް ފޯސްގައި ހިމެނޭ މެންބަރުން
- މުހައްމަދު ޣައްސާން މައުމޫން – މިނިސްޓާ އޮފް ޑިފެންސް
- އަލީ އިހްސާން - މިނިސްޓާ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ
- ޑރ. އިސްމާއީލް ޝަފީއު - މިނިސްޓާ އޮފް އެޑިޔުކޭޝަން
- ޑރ. އަބްދުﷲ ހަލީލު – މިނިސްޓާ އޮފް ހެލްތް
- ތޯރިގް އިބްރާހީމް - މިނިސްޓާ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނާޖީ
- އާދަމް ޝަރީފް އުމަރު - މިނިސްޓާ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވާކްސް
- އަބްދުﷲ ފަޔާޒް – ޗީފް އޮފް ސްޓާފް
- ޗީޕް އޮފް ޑިފެންސް ފޯސް މޭޖާ ޖެނެރަލް އިބްރާހީމް ހިލްމީ
- ކޮމިޝަނާ އޮފް ޕޮލިސް އަލީ ޝުޖާއު
މިއަދު ކުރި ވިއްސާރައިގައި މާލެ ސިޓީގެ ބޮޑުބައެއްގަައި ފެންބޮޑުވުމުގެ ސަބަބުން މާލޭގައި މިހާރު ކުރިއަށްދާ އިމަޖެންސީ އޮޕަރޭޝަންގެ އެންމެ ފަހުގެ އަޕްޑޭޓަށް ބަލާއިރު، މިއަދު ބޯކޮށް ވާރޭ ވެހުމުގެ ސަބަބުން ފެންބޮޑުވުމުގެ ސަބަބުން 231 ފަރާތެއް ވަނީ ރިޕޯޓް ކޮށްފައެވެ. ވިއްސާރައާ ގުޅިގެން ހާލުގައި ޖެހިފައިވާ އާއިލާތައް ރައްކާތެެެރި ތަންތަނަށް ބަދަލުކުރުމުގެ މަސައްކަތް އަންނަނީ ކުރަމުންނެވެ. މި ވިއްސާރައިގައި ރާއްޖޭގެ އެކި ހިސާބުތަކަށް ބޯކޮށް ވާރޭ ވެހެމުން އަންނަ އިރު، މިއަދު މާލެ ސީޓީގައި ފެންބޮޑުވެ، މަގުމަތީގައި އުޅަނދުފަހަރު ނުދުއްވޭ ވަރު ވިއެވެ. ބައެއް ސަރަހައްދުތަކުގައި ކަކޫތާ ފެން ހުރި އިރު، ސައިކަލުތަކުގައި ދަތުރު ނުކުރެވޭ ވަރަށް ފެންބޮޑުވިއެވެ.
މި ކަމާ ގުޅިގެން މިރޭ ސަރުކާރުން ވަނީ މާދަމާއަކީ ސަރުކާރ ބަންދު ދުވަހެއްގެ ގޮތުގައި ނިންމާފައެވެ. އެއީ ރާއްޖޭގެ ވަރަށް ގިނަ ރަށްތަކަށް ބޯކޮށް ވާރޭވެހި މޫސުން ގޯސްވުމުގެ ސަބަބުން، ކިޔަވާ ކުދީންނާއި ވަޒީފާ އަދާކުރާ ފަރާތްތަކަށް ވެސް ދަތުރުފަތުރު ކުރުމާ ހިނގާބިނގާވާން ދަތިވުމާ ގުޅިގެން ދިން ލިޔެއްގެ ގޮތުގައި ސަރުކާރުން ނިންމި ނިންމުމެކެވެ.
މިހާރު ކުރަމުންދާ ވިއްސާރައާ ގުޅިގެން މެޓް އޮފީހުން ބުނެފައި ވަނީ ކުރިއަށް އޮތް 5 ދުވަހަކީ ވެސް މޫސުން ގޯސްވެ ވިއްސާރަ ކުރާނެ ދުވަސްތަކެއް ކަމަށެވެ. ހަމައެއާއެކު ވައި ގަދަވާނެ ކަމަށާއި އެހެންކަމުން ކަނޑުތައް ވެސް ގަދަވާނެ ކަމަށް މޫސުމާ ބެހޭ އިދާރާއިން ބުނެއެވެ. އަދި ދިޔަވަރު ބޮޑުވާ ގަޑީގައި އުދަ އަރާނެ ކަމަށް ވެސް ވަނީ ލަފާކޮށްފައެވެ.
