މަންމައަށް އަނިޔާކުރިކަމުގެ ތުހުމަތުގައި މީހަކު ހައްޔަރުކޮށް، ބަންދުގެ މުއްދަތު ޖަހައިފިއެވެ.
މި މައްސަލައިގެ ތުހުމަތުގައި ހައްޔަރު ކޮށްފައި ވަނީ ކ. ގުރައިދޫއަށް ނިސްބަތްވާ އުމުރުން 38 އަހަރުގެ ދިވެހި ފިރިހެނެކެވެ.
އޭނާގެ މައްޗަށް ތުހުމަތުކުރަނީ ގެވެށި އަނިޔާއާއި މާރާމާރީ ހިންގުމެވެ. އެ މީހާގެ ބަންދާ މެދު ގޮތެއް ނިންމަން އިއްޔެ ކްރިމިނަލް ކޯޓަށް ހާޒިރުކޮށްފައި ވާއިރު، ޝަރީއަތުން ނިންމާފައިވަނީ ތުހުމަތެއް ވުޖޫދުކުރެވޭ ވަރަށް އޭނާއާ ދެކޮޅަށް ހެކި ހުށަހަޅާފައިވާ ކަމަށެވެ.
އެމީހާ ބަންދުކުރުމަށް ނެރުނު ކޯޓު އަމުރުގައި ވަނީ ފުލުހުން އޭނާއާ ދެކޮޅަށް ހުށަހަޅާފައިވާ ބަޔާންތަކުގެ އަލީގައި އެއީ މަންމައަށް އަނިޔާކުރި މީހެއް ކަމަށެވެ. އެހެންކަމުން ކޯޓުން ވަނީ އޭނާގެ ބަންދަށް 15 ދުވަސްޖަހާފައެވެ. އޭނާގެ ބަންދުގެ މުއްދަތު ޖަހާފައިވަނީ ޖިނާއީ އިޖުރާއަތުގެ ގާނޫނުގެ ދަށުން މުޖުތަމައުގެ ސަލާމަތަށް ނުރައްކާވެދާނެ ކަމަށް ފެންނާތީއާއި އޭނާ ހެއްކަށް ނުފޫޒު ފޯރުވާފާނެކަމަށް ބެލެވޭތީ ކަމަށް ކޯޓު އަމުރުގައިވެއެވެ.
