ބަންގްލަދޭޝްގެ ވަގުތީ ސަރުކާރާ ހަވާލުވެވަޑައިގެންނެވި ޑރ. މުހައްމަދު ޔޫނުސްއަށް ރައީސް ޑރ. މުހައްމަދު މުއިއްޒު މަރުހަބާ ދަންވައިފިއެވެ.
އެކްސްގައި ކުރެއްވި ޕޯސްޓެއްގައި ރައީސް ވަނީ ބަންގްލަދޭޝްގެ ވަގުތީ ސަރުކާރުގެ ޗީފް އެޑްވައިޒަރުގެ މަގާމަށް ޑރ. މުހައްމަދު ޔޫނުސް އައްޔަންކުރައްވާފައިވާތީ އެމަނިކުފާނަށް މަރުބާ ދަންނަވާފައެވެ.
ރައީސް ވިދާޅުވީ ބަންގްލަދޭޝްގެ ދުވަސްވީ ރަހްމަތްތެރިއެއްގެ ހައިސިއްޔަތުން ދިވެހިރާއްޖެއިން އެދެނީ ޔޫނުސްގެ ވެރިކަމުގެ ދަށުން އެ ގައުމުގެ ރައްޔިތުންނަށް އެއްބައިވަންތަކަމާއި، ސުލްހަވެރިކަމާއި އަދި ފާގަތިކަން ލިބުން ކަމަށެވެ.
ބަންގްލަދޭޝްގައި ވަގުތީ ސަރުކާރެއް އެކުލަވާލާފައި ވަނީ ބަންގްލަދޭޝްގެ ބޮޑުވަޒީރު ޝައިހު ހަސީނާ އިސްތިއުފާދެއްވުމާއި ގުޅިގެންނެވެ. އެ މަގާމުން އިސްތިއުފާ ދެއްވުމަށްފަހު އަވަށްޓެރި އިންޑިއާގެ ހިމާޔަތް ހޯއްދަވައިގެން ހަސީނާ ވަނީ އެ ގައުމަށް ވަޑައިގެންފައެވެ.
2009 އިން ފެށިގެން ބަނގްލަދޭޝްގައި ވެރިކަން ކުރައްވަމުން ގެންދެވި ހަސީނާ އިސްތިއުފާ ދެއްވަން މަޖުބޫރުވެވަޑައިގަތީ، އެގައުމުގައި ސިވިލް ސާވީސްގެ ވަޒީފާ ދިނުމުގައި 1971 ގެ ހަނގުރާމައިގައި ބައިވެރިވި ފަރާތްތަކުގެ އާއިލާތަކަށް ކޯޓާއެއް ކަނޑައަޅާފައި އޮންނަ މައްސަލައިގައި އާންމުން ހިތްހަމަ ނުޖެހި ފެށި މުޒާހަރާތަކުގައި އާންމުންގެ ބަޔަކު މަރުވެފައި ވުމުން އުފެދުނު ރުޅިވެރިކަމުގައި ކުރަމުން ދިޔަ މުޒާހަރާ ކޮންޓްރޯލުން ނެއްޓިގެންނެވެ.
