ވިޔަފާރިވެރިޔާ އަބްދުއްލަތީފް ހުސައިން މަނިކު (އަތަމާ އަބްދުއްލަތީފް)އަކީ ދިވެހި އިގްތިސޯދަށް ހެޔޮ ބަދަލުތަކެއް ގެނެސްދިނުމުގައި މުހިންމު ހިއްސާދާރެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މަޝްހޫރު ވިޔަފާރިވެރިޔާ، މ.މެޑޯޒް، އަތަމާ އަބްދުއްލަތީފް އަވަހާރަވެފައި ވަނީ އޭޑީކޭގައި ފަރުވާ ހޯއްދަވަމުން ދަނިކޮށް މިއަދު މެންދުރުގެ ވަގުތެއްގައެވެ.
އަތަމާ އަބްދުއްލަތީފް ނިޔާވުމާ ގުޅިގެން ތައުޒިޔާ ދަންނަވާ އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ އަބްދުއްލަތީފްއަކީ ރާއްޖޭގައި ވިޔަފާރި ކުރިއެރުވުމަށް ދިގު މުއްދަތެއްގައި ގިނަ މަސައްކަތްތަކެއް ކޮށްދެއްވާފައިވާ، އަދި ޖަމާއަތަށް ފައިދާހުރި އެތައް ހިދުމަތަކެއް ކުރައްވާފައިވާ ބޭފުޅެއް ކަމަށެވެ. އެގޮތުން މިސްކިތް ބިނާކުރެއްވުމާ، ގިނަ އަދަދެއްގެ ދިވެހީން ހައްޖަށް ގެންގޮސްދެއްވުން ފަދަ ދަރުމަވެތި އެތައް ކަމެއް ގައުމަށްކޮށްދެއްވާފައިވާކަން ރައީސް ފާހަގަކުރެއްވިއެވެ.
އަތަމާ އަބްދުއްލަތީފް އަވަހާރަވީ ހަބަރު އަޑުއެއްސެވީ ފުން ހިތާމައާއެކުގައިކަން ފާހަގަކޮށް ރައީސް ވިދާޅުވީ އަބްދުއްލަތީފްއަކީ، ދިވެހި ވިޔަފާރިވެރީންގެ އިސް ސަފުގައި ހަރަކާތްތެރިވެ ވަޑައިގެންނެވި އަދި ދިވެހީންނަށް އަމިއްލައަށް އެތައް ކަމެއް ކުރެވޭނެކަން ހިތްވަރާ އަޒުމާއެކު ސާބިތުކޮށްދެއްވި ބޭފުޅެއް ކަމަށެވެ. އަދި ޒަމާނާގުޅޭ އެތައް ހެޔޮ ބަދަލެއް ދިވެހި އިގްތިސޯދަށް ގެނެސްދެއްވުމުގެ މުހިންމު ހިއްސާދާރެއް ކަމަށް އެމަނިކުފާނު ވަނީ ވިދާޅުވެފައެވެ.
ރައްޔިތުންގެ ލާބަޔާ މަންފާއަށް ހޭދަކުރެއްވުމުގައި އަދި ދީނީ ކަންކަން ކުރިއެރުވުމުގައި އަބްދުއްލަތީފް އިސްކޮށް ހަރަކާތްތެރިވެލެއްވި ކަމަށާއި ޖަމާއަތަށް ފައިދާހުރި ހާއްސަ މަސައްކަތްތައް ކޮށްދެއްވުމުގެ ރޮނގުން ގައުމީ އިނާމް 1991 ވަނަ އަހަރު ހާސިލްކުރައްވާފައިވާކަން ވެސް ރައީސް ވަނީ ފާހަގަކުރައްވާފައެވެ.
ރައީސް އިތުރަށް ވިދާޅުވީ ގެއްލިގެން އެދިޔައީ ގައުމަށް ބޮޑެތި މަސައްކަތްތަކެއްކޮށްދެއްވި އަގުހުރި، ތަޖްރިބާކާރު، ނަމޫނާ ޝަހްސިއްޔަތެއް ކަމަށެވެ. ރައީސް ވަނީ މަރުހޫމްގެ ލޮބުވެތި އާއިލާއަށް ކެތްތެެރިކަން ދެއްވުން އެދި އަދި މަރްހޫމްއަށް ސުވަރުގޭގެ ދާއިމީ ނިއުމަތް ދެއްވުން އެދި ދުއާކުރައްވާފައެވެ.
