ރައްޔިތުންގެ މަޖިލީހުގެ މިއަދުގެ ޖަލްސާގައި ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓާ ޑރ. އަބްދުﷲ މުއްތަލިބު އާއި ސުވާލުކުރުމުގެ ފުރުސަތު ވިލިމާލޭ ދާއިރާގެ މެންބަރު އަދި ޕީއެންސީގެ ޕާލިމަންޓްރީ ގްރޫޕުގެ ޑެޕިއުޓީ ލީޑަރު މުހައްމަދު އިސްމާއީލަށް ނުދެއްވަނެކަމަށް މަޖިލީހުގެ ރިޔާސަތުން ވިދާޅުވެއްޖެއެވެ.
ވިލިމާލެއަށް ސަރުކާރުތަކުން އަޅައިނުލާ ކަމަށް ވިދާޅުވެ ކޮންސްޓަރަކްޝަން މިނިސްޓަރު ޑރ. އަބްދުﷲ މުއްތަލިބު ސުވާލުކުރުމަށް، ރައްޔިތުންގެ މަޖިލީހަށް މިއަދު ހާޒިރުކޮށްފައިވާއިރު މުހައްމަދު އިސްމާއީލު ވަނީ ސަރުކާރުން ވިލިމާލެއަށް އަޅާނުލާކަމަށް ވިދާޅުވެފައެވެ. އެގޮތުން ތިލަމާލެ ބުރިޖުގެ މަސައްކަތްކުރާއިރު ވަކިން ހިއްކައިގެން މަގެއް ހަދައިގެން އެ ތަނުގެ މަސައްކަތްކުރާނެ ކަމަށް އެއްބަސްވުމުގައި އޮތް ނަމަވެސް ވިލިމާލޭގެ މަގު ބޭނުންކޮށްގެން މަސައްކަތްކުރާތީ އެ މަގަށް އިންތިހާއަށް ގެއްލުންވާ ކަމަށް ވިދާޅުވެ މުހައްމަދު އިސްމާއީލް ވަނީ ކަންބޮޑުވުންފާޅުކޮށްފައެވެ. ވޯޓަށް ނޫން އެހެން ގޮތަކަށް އެއްވެސް ސަރުކާރަކަށް ވިލިމާލޭގެ ރައްޔިތުން ނުފެންނަކަން ފާހަގަކުރައްވަމުން މުހައްމަދު އިސްމާއީލް ވިދާޅުވީ ސަރުކާރު އެކުލެވިގެން އައިއިރު ވަޒީރާ އެކު ބައްދަލުވުމެއް ބޭއްވިކަމަށް ވިދާޅުވެފައެވެ.
އެހެންނަމަވެސް މުހައްމަދު އިސްމާއީލްގެ ވާހަކަ ފުރިހަމަ ނުކުރެވެނީސް މަޖިލީހުގެ ރިޔާސަތުންވަނީ މައިކުގެ އަޑުކަޑާލާފައެވެ. އަދި މަޖިލީހުގެ ރައީސް އަބްދުއްރަހީމް ވިދާޅުވީ، މަޖިލީހުގެ ފްލޯގައި އަޑުގަދަ ކުރެއްވުމުގެ ފުރުސަތު ނުދެއްވާނެ ކަމަށެވެ. އަދި، މުހައްމަދު އިސްމާއިލް އަމަލުކުރައްވަމުން ގެންދެވީ މަޖިލީހުގެ ގަވާއިދާ ހިލާފަށްކަން ފާހަގަކުރައްވަމުން އަބްދުއްރަހީމް ވަނީ މަޖިލީހުގެ ފުރުސަތު ނަންގަވައިގެން ބޭނުންހާ ވާހަކައެއް ދައްކަން ރިޔާސަތުން ފުރުސަތު ނުދޭނެކަމަށް ބުނެފައެވެ.
ރައްޔިތުންގެ މަޖިލީހުގެ ރިޔާސަތުން އަމަލުކުރި ގޮތުން، އެމްޑީޕީގެ ކެންދޫ ދާއިރާގެ މެންބަރު މައުރޫފް ޒާކިރު ވަނީ ނިޒާމީ ނުކުތާއެއް ނަންގަވާފައެވެ. އަދި ންބަރު މުޙައްމަދު އިސްމާއިލަށް ސުވާލުކުރެއްވުމުގެ ފުރުސަތު ނުދެއްވީ ކީއްވެތޯ ސުވާލުކުރައްވާ މެންބަރުންގެ މެދުގައި ތަފާތުކުރައްވަނީތޯ ސުވާލުކުރެއްވިއެވެ. މެންބަރު މައުރޫފް ޒާކިރުގެ ވާހަކައަށް ޖަވާބުދެއްވަމުން އަބްދުއްރަހީމް ވިދާޅުވީ ވިލިމާލޭ މެންބަރަށް އެ ފުރުސަތު ނޭރުވީ އެ މެންބަރު މަޖިލީހުގައި ބަހުސްކުރައްވަމުން ގެންދަވާ އުސޫލުން މިއަދު ކުރެވުނު ސުވާލާ އެއްވެސް ގުޅުމެއް ނެތް ވާހަކައެއް ދައްކަވަމުން ގެންދަވާތީ ކަމަށެވެ.
