ރައީސް ޑރ. މުހައްމަދު މުއިއްޒުގެ ދެކަނބަލުންނަށް ސިހުރު ހެދިކަމުގެ ތުހުމަތުގައި ހައްޔަރުކުރި އެންވަޔަރަމަންޓް މިނިސްޓްރީގެ ސްޓޭޓް މިނިސްޓަރު ފާތިމަތު ޝަމްނާޒް އަލީ ސަލީމާއި އޭނާގެ ކޮއްކޮ ހައްވާ ސަނާ ސަލީމް ބަންދުން ދޫކޮށްލައިފިއެވެ.
މި މައްސަލައިގައި ޝަމްނާޒް، 40އ އާއި ސަނާ، 26އ ގެ އިތުރުން، ހުސައިން ސަމީރު، ނިވައިދޮށުގެ / ތ. ކިނބިދޫ ހައްޔަރުކުރީ މިދިޔަ މަހުގެ 23 ގައެވެ. ބަންދުގެ މުއްދަތު ޖެހުމަށް ތިން މީހުން ހާޒިރުކުރުމުން ކޯޓުން ވަނީ ތިން މީހުންނަށް ހަތް ދުވަހުގެ ބަންދެއް ޖަހައިފައެވެ. މީގެ ތެރެއިން ސަމީރު މި މަހުގެ ފުރަތަމަ ދުވަހު ދޫކޮށްލައި، ޝަމްނާޒާއި ސަނާގެ ބަންދުގެ މުއްދަތު އިތުރުކުރިއެވެ.
މީޑިއާ އަށް ދިން މައުލޫމާތުގައި ފުލުހުން މިއަދު ބުނީ، ޝަމްނާޒާއި ސަނާގެ ބަންދުގެ މުއްދަތު ހަމަވުމުން ބަންދާ މެދު ގޮތެއް ނިންމުމަށް ހާޒިރުކުރުމުން ކޯޓުން ދެ މީހުން ވެސް ދޫކޮށްލަން ނިންމާފައިވާ ކަމަށާއި، ދެ މީހުން ދޫކޮށްލީ ބަންދުގައި އިތުރަށް ބެހެއްޓުމަށް ނުފެންނާތީ ކަމަށެވެ.
ޝަމްނާޒްގެ އިތުރުން، އޭނާގެ ކުރީގެ ފިރިކަލުން އަދި ރައީސް އޮފީހުގެ ވަޒީރު އާދަމް ރަމީޒް ވެސް ވަނީ މަގާމުން އެކަހެރިކޮށްފައެވެ. އެކަމަކު ރަމީޒް މަގާމުން އެކަހެރިކުރި ސަބަބެއް ސަރުކާރުން ހާމައެއް ނުކުރެއެވެ.
