އާ އަހަރުގެ އަޒުމަކަށް ހަދަންވީ ރާއްޖޭގެ މާދަމާގެ ސަލާމަތާއި، ފުދުންތެރިކަމާއި، ތަމައްދުނަށްޓަކައި ސަރުކާރުން ފަށާފައިވާ އިސްލާހީ އަދި ބިނާކުރަނިވި މަސައްކަތްތަކަށް އެއްބާރުލުން ދިނުމަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވެފައި ވަނީ ހިޖުރީ އާ އަހަރު ފެށުމުގެ މުނާސަބަތުގައި، ރާއްޖޭގެ ރައްޔިތުންނަށް ފޮނުއްވެވި ހިތާބު ގައެވެ.
އެގޮތުން ހިޖުރީ އާ އަހަރެއްގައި، ދިވެހި ރައްޔިތުން އެއްބައިވަންތަވެ، މިއަދު އާ ކުރަންވީ އެއް އަޒުމަކީ، ގައުމުގެ ކަންކަން އިސްލާހުކުރުމުގައި އެންމެން އެކަތިގަނޑަކަށް ވުމެވެ. ވޭތުވެ މިދިޔަ އެތައް އަހަރަކު އަޅައިނުލެވި ދޫކޮށްލާފައި ހުރުމުގެ ސަބަބުން، ދިވެހި ފަސްގަނޑުގައި، ދިވެހިރާއްޖޭގެ ގާނޫނުތަކާ ހިލާފަށް އެތައް ބިދޭސީއަކު ދިރިއުޅެމުންދާ ކަމަށް އެމަނިކުފާނު ފާހަގަ ކުރެއްވިއެވެ.
އަދި މަސްތުވާތަކެއްޗާއި، ގޭންގު ކުށްތައް ފަދަ ކަންކަން ހުއްޓުވައި، މީހުންނަށް ހެޔޮ ވިސްނައިދިނުމުގައި މުޖްތަމައުވަނީ އިހުމާލުވެފައި ކަމަށާއި ލިބޭ އެއްޗަކުން ދެކޮޅު ޖެއްސުމާއި ހަރަދުބަރަދު ކުޑަކުރުން ފަދަ އާދަތަކަށް އަހުލުވެރިވުން ކުޑަ ކަމަށް ރައީސް ވަނީ ވިދާޅުވެފައެވެ. އަދި މާނަވީ ގޮތުން ބަލާއިރު، ހިޖުރަކުރުމުގެ މާނައަކީވެސް އިންސާނާ ހުރި ހާލަތުން، އެއަށްވުރެ ރަނގަޅު ހެޔޮ ގޮތްތަކަކަށް ރުޖޫއަވުން ކަމަށް ރައީސްގެ ހިތާބުގައި ވިދާޅުވެފައި ވެއެވެ.
ފަލަސްތީން މުސްލިމުންގެ މަތިން ހަނދާން އާ ކުރައްވަމުން ރައީސް ވިދާޅުވީ ހިޖްރީ ސަނަތުން 1446 ވަނަ އަހަރާ ބައްދަލުކުރާއިރު، މުޅި އިސްލާމީ އުންމަތަށް އޮތް އެންމެ ބޮޑު ކަންބޮޑުވުމަކީ، ފަލަސްތީނުގެ މުސްލިމް އަހުންނާއި އުހްތުންނަށް ކުރިމަތިވެފައިވާ ނުތަނަވަސްކަން ކަމަށެވެ. އެތަނުގައި ކުރިމަތިވަމުންދަނީ ހަނގުރާމައިގެ ނާމާން ހާލަތުކަން ފާހަގަ ކުރައްވާ ރައީސް ވިދާޅުވީ މުޅި އުންމަތަށް ކުރިމަތިވެފައިވާ މިފަދަ ހުރިހާ ގޮންޖެހުންތަކުން އަރައިގަތުމަށްޓަކައި، "މިއީ އެއް އުންމަތެއްކަމުގައި" ކީރިތި ގުރްއާނުގައި ދެއްވާފައިވާ މަތިވެރި އިރުޝާދު ނަގަހައްޓައި، މުސްލިމުންގެ މެދުގައި އޮތް އެހީތެރިކަމާއި، އެއްބާރުލުމާއި، ގުޅުންތައް ވަރުގަދަކުރަން ޖެހޭ ކަމަށެވެ.
އަދި އިސްލާމީ އުންމަތުގެ ހައްގުގައި އަޑުއުފުލުމަށް އިސްނަގާ، އަދި އުންމަތުގެ ކުރިއެރުމަށްޓަކައި ޖޯޝާއެކު މަދަދުދޭ ބަޔެއްގެ ގޮތުގައި ދިވެހީން އަބަދުވެސް ދެމި ތިބޭނެ ކަމަށް އެމަނިކުފާނު ވިދާޅުވިއެވެ.
ހަމައެހެންމެ ހިޖްރީ އާ އަހަރު ހަނދާން އާ ކޮށްދެނީ ކީރިތި ރަސޫލާ صلى الله عليه وسلمގެ ހަޔާތްޕުޅުގައި އެކަލޭގެފާނު ނިންމެވި އެންމެ ހައްސާސް އެއް ނިންމެވުން ކަން ފާހަގަކޮށް ރައީސް ވިދާޅުވީ، ހިޖުރައިގެ ދަތުރުފުޅުގެ މަތީގައި އެކަލޭގެފާނު ކަންކަން ކުރެއްވި ގޮތާއި، މަދީނާއަށް ވަޑައިގެން އިސްލާމީ ދައުލަތެއް ގާއިމުކުރުމަށް އެޅުއްވި ފިޔަވަޅުތަކާއި، މައްކާ ފަތަހަ ކުރެއްވުމުގެ ބޮޑު ކާމިޔާބީ، އޭގެ 10 ވަރަކަށް އަހަރު ފަހުން ހާސިލްކުރެއްވި ގޮތަކީ، ކޮންމެ ގައުމެއްގެ ކުރިއެރުމާއި ކާމިޔާބީއަށްވެސް އަގުހުރި ދަރެސްތަކެއް ކަމަށެވެ.
އަދި މަދީނާގައި ކީރިތި ރަސޫލާ صلى الله عليه وسلم ހޭދަކުރެއްވި ދުވަސްތަކުން އަޅުގަނޑުމެންނަށް ފެންނާން އޮތީ، މުސްލިމުންގެ މެދުގައި ގުޅުން ބަދަހިކޮށް އަހްވަންތަކަން ވަރުގަދަ ކުރެއްވުމަށް އެކަލޭގެފާނު އިސްކަން ދެއްވިކަން ކަމަށް އެމަނިކުފާނު ވިދާޅުވިއެވެ. އަދި އަވަށްޓެރީންގެ ގޮތުގައި ތިބި އެކި ދީންތަކާއި، އެކި ފިކުރުތަކުގެ އަހުލުވެރީންނާއެކު ސުލްހަ ގާއިމުކުރެއްވިއެވެ. މަދީނާގެ ބާޒާރުތަކަކީ ވިޔަފާރީގެ މަގްބޫލް މަރުކަޒުތަކަކަށް ހެއްދެވުމުގެ އިތުރުން ފެހިކަމާއި ދިރުން އިހްސާސް ކުރެވޭ ވަޒަނެއްގެ ގޮތުގައި މަދީނާ އާބާދުކުރެއްވިއެވެ. ތައުލީމީ ނިޒާމެއް ގާއިމްކުރެއްވިއެވެ. ބޭސްފަރުވާއާއި އެނޫން އިޖްތިމާއީ ހިދުމަތްތަކަށް ފަހި، މެހްމާނުންނަށް ކަމޭ ހިތުމުގައި މަގްބޫލު ރަށަކަށް މަދީނާ ހެއްދެވިކަން ރައީސް ފާހަގަ ކުރެއްވިއެވެ.
މީގެ އިތުރުންވެސް މި ފެށުނު އާ އަހަރަކީ، ކީރިތި ﷲގެ މަދަދާއި ރަހްމަތާއެކު، ދިވެހިރާއްޖެއަށް ފާގަތި އަހަރެއް ކަމުގައި، އަދި ތަރައްގީގެ ރޮނގުގައި ދިވެހީން އެދޭ އެތައް އުންމީދެއް ހަގީގަތަކަށް ވާނޭ އަހަރެއް ކަމުގައި ހެދުމަށް ރެޔާދުވާލު ހިންމަތާއެކު ސަރުކާރުން މަސައްކަތްކުރާނެ ކަމަށް އެމަނިކުފާނު ވިދާޅުވިއެވެ.
