މިދިޔަ މަހު ޑެންގީ ހުމުގެ 610 ކޭސް އަދި އިންފުލުއެންޒާގެ 21 ކޭސް ރިޕޯޓްކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
އެޗްޕީއޭއިން ނެރުނު ތަފާސް ހިސާބުތަކުން ދައްކާގޮތުގައި އޭޕްރީލް މަހާ އަޅާ ބަލާއިރު މިދިޔަ މަހު ޑެންގީ ހުމާއި އިންފުލުއެންޒާއަށް ޕޮޒިޓިވްވި މީހުންގެ އަދަދު ވަނީ އިތުރުވެފައެވެ.
އެގޮތުން ބަލާއިރު މިދިޔަ އޭޕްރީލް މަހު ޑެންގީ ހުން ޖެހިގެން ރިޕޯޓު ކޮށްފައިވަނީ 247 ކޭސްއެވެ. އަދި މިދިޔަ މަހު ރިޕޯޓްކޮށްފައި ވަނީ 610 ކޭސްއެވެ. މިދިޔަ އަހަރުގެ އޭޕްރީލް މަހު ޑެންގީ ހުމުގެ 330 ކޭސް ރިޕޯޓްކޮށްފައި ވާއިރު މެއި މަހު ރިޕޯޓްކޮށްފައި ވަނީ 272 ކޭސްއެވެ.
އެޗްޕީއޭއިން ބުނި ގޮތުގައި މިދިޔަ މަހު 138 މީހުން އިންފުލުއެންޒާއަށް ޓެސްޓުކޮށްފައި ވާއިރު، އިންފުލުއެންޒާއަށް ޕޮޒިޓިވްވެފައި ވަނީ 138 މީހުންނެވެ. އަދި މި އަހަރު މިހަތާނަށް ޖުމްލަ 1،139 މީހުން ޓެސްޓްކޮށްފައި ވާއިރު، ޕޮޒިޓިވްވެފައި ވަނީ 161 މީހުންނެވެ.
މީގެއިތުރުން އަރިދަފުސް ރޯގާގެ ކޭސްތަކަށް ބަލާއިރު މިދިޔަ އޭޕްރީލް މަހު ރިޕޯޓްކޮށްފައި ވަނީ 22،739 ކޭސްއެވެ. ނަމަވެސް، މިދިޔަ މަހު އެ އަދަދު ވަނީ 21،720 އަށް ދަށްވެފައެވެ. އަދި މިދިޔަ އަހަރުގެ މޭ މަހު ރިޕޯޓްކޮށްފައި 21،327 ކޭސްއެވެ.
ޑެންގީހުން އަދި ވައިރަލް ހުން އެންމެ ގިނައިން ރިޕޯޓްކޮށްފައި ވަނީ ކ. އަތޮޅުން ކަމަށް އެޗްޕީއޭގެ ތަފާސްހިސާބުތަކުން ދައްކައެވެ. އަދި އަރިދަފުސް ރޯގާ އެންމެ ގިނައިން ރިޕޯޓްކޮށްފައި ވަނީ ޅ. އަތޮޅުންނެވެ.
