ތިންވަނަ ދައުރަކަށް އިންތިހާބުވެވަޑައިގެންނެވި އިންޑިއާގެ ބޮޑުވަޒީރު ނަރެންދްރާ މޯދީ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް، ރައީސް ޑރ. މުހައްމަދު މުއިއްޒު އެ ގައުމަށް މިރޭ ފުރާވަޑައިގެންފިއެވެ.
އިންޑިއާ ސަރުކާރުން ރައީސަށް ފޮނުވި ދައުވަތު އެމަނިކުފާނަށް އެރުއްވީ، އެކަމަށްޓަކައި ރައީސް އޮފީހުގައި ބޭއްވި ރަސްމިއްޔާތެއްގައި އިންޑިއާގެ ސަފީރު މޫނޫ މަހާވަރެވެ. ރައީސް އެ ދައުވަތު ގަބޫލުފުޅުކުރެއްވި ކަމަށް ވަނީ މިދިޔަ ބުރާސްފަތި ދުވަހުގައެވެ.
ރައީސްގެ އިތުރުން، މި ދަތުރުފުޅުގައި އެމަނިކުފާނާ އެކު ފޮރިން މިނިސްޓަރު މޫސާ ޒަމީރާއި ފިނޭންސް މިނިސްޓަރު ޑރ. މުހައްމަދު ޝަފީގާއި އިކޮނޮމިކް މިނިސްޓަރު މުހައްމަދު ސައީދު ބައިވެރިވެވަޑައިގަންނަވާނެއެވެ.
މޯދީގެ އިތުރުން، އެމަނިކުފާނުގެ ވަޒީރުންގެ މަޖިލިސް ވެސް ހުވާކުރައްވާ މި ރަސްމިއްޔާތު އޮންނާނީ މާދަމާރޭގެ ވަގުތެއްގައެވެ. އިންޑިއާގެ 'އެންޑީޓީވީ' އިން ރިޕޯޓުކުރާ ގޮތުގައި، އެ ރަސްމިއްޔާތު ބޭއްވުމަށް ހަމަޖެހިފައިވަނީ އެ ގައުމުގެ ގަޑިން މާދަމާރޭ 7:15 ހާއިރެވެ.
މި ރަސްމިއްޔާތުގައި ރާއްޖެ ހިމެނޭހެން ބައެއް އެހެނިހެން ގައުމުތަކުގެ އިސް ބޭފުޅުން ވެސް ބައިވެރިވެވަޑައިގަންނަވާނެއެވެ. އޭގެ ތެރޭގައި އަވަށްޓެރި ސްރީލަންކާގެ ރައީސް ރަނިލް ވިކްރަމަސިންހަ އާއި ބަންގްލަދޭޝްގެ ބޮޑުވަޒީރު ޝައިޚް ހަސީނާ ހިމެނިވަޑައިގަންނަވައެވެ.
މިއީ ވެރިކަމުގެ ހުވާކުރެއްވި ފަހުން ރައީސް އިންޑިއާއަށް ކުރައްވާ އަލަތު ރަސްމީ ދަތުރުފުޅެވެ.
