އެމްޑީޕީއިން އެދުމާ ގުޅިގެން ރައްޔިތުންގެ މަޖިލީހުގެ 2 ކޮމިޓީއަކުން އިތުރު ޖާގަ ހަމަޖައްސައި ދީފައި ވާ ކަމަށް އެމްޑީޕީ ޕާލަމެންޓްރީ ގްރޫޕުގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވެއްޖެއެވެ.
ޕީއެންސީގެ ޕީޖީއިން އެމްޑީޕީއަށް ހަމަޖައްސައިދީފައި ވަނީ އިގްތިސޯދީ ކޮމިޓީއިން އިތުރު 1 ޖާގަ އަދި މާލިއްޔަތު ކޮމިޓީއިން އިތުރު 1 ޖާގައެވެ.
އެމްޑީޕީގެ ޕާލިމެންޓް ގްރޫޕުން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ނާޒިލް ވިދާޅުވީ މަޖިލީހުގެ ކޮމިޓީތަކުން ޖާގަ ދީފައި ވަނީ އެމްޑީޕީއިން ހޮވިފައިވާ 12 މެންބަރުންގެ ނިސްބަތުން ކޮމިޓީތަކަށްވާ އަދަދަށް ކަމަށެވެ. ނަމަވެސް މުހިންމު ބައެއް ކޮމިޓީތަކުން 1 ޖާގަ ލިބިފައި ވުމާއެކު އިތުރު ޖާގައެއް އެދެން އެމްޑީޕީއިން ނިންމި ކަމަށް އޭނާ ވިދާޅުވިއެވެ.
ފުރަތަމަ އެކަމަށް އެދުމުން އެކަން ނުވާނެ ކަމަށް ޕީއެންސީއިން ބުނި ކަމަށް ނާޒިލް ވިދާޅުވިއެވެ. އަދި އެއާއެކު އެމްޑީޕީގެ ޕީޖީއިން މަޖިލީހުގެ އިދާރީ ކަންތައްތަކާ ހަވާލުވެ ތިބި ފަރާތްތަކާ ވާހަކަ ދެއްކި ކަމަށް އޭނާ ވަނީ ވިދާޅުވެފައެވެ.
ނާޒިލް ވިދާޅުވީ އެމްޑީޕީއިން ބޭނުންވީ ކޮމިޓީތަކުގެ 2 ވަނަ ޖާގައަށް އޮންނަ ފުރުސަތުގައި ގުރުއަތަކަށް ދިއުމަށް ކަމަށެވެ. ނަމަވެސް ގުރުއަތަކަށް ދާން ޖެހުނު ހިސާބުން ޕީއެންސީގެ ޕީޖީއިން ބޭނުންވީ މަޝްވަރާ ކުރުމަށްފަހު ގޮތެއް ނިންމަން ކަމަށް އޭނާ ވިދާޅުވިއެވެ.
އެގޮތުން އެމްޑީޕީއިން ވަނީ 3 ކޮމިޓީއަކުން، (އިގްތިސޯދީ ކޮމިޓީ، މާލިއްޔަތު ކޮމިޓީ އަދި 241 ކޮމިޓީ) އިތުރު ޖާގައެއް ދިނުމަށް އެދިފައެވެ. ނަމަވެސް އިތުރު ޖާގަ ލިބިފައި ވަނީ އިގްތިސޯދީ ކޮމިޓީ އަދި މާލިއްޔަތު ކޮމިޓީއިންނެވެ. 241 ކޮމިޓީއިން އިތުރު ޖާގައެއް ލިބިފައެއް ނުވެއެވެ.
ނާޒިލް އިތުރަށް ވިދާޅުވީ ޕީއެންސީ ޕީޖީގެ ވިސްނުމާ އެއްގޮތަށް އެކަން ދޫކޮށްލަން އެމްޑީޕީއިން ނިންމި ކަމަށެވެ. އަދި ކޮމިޓީތައް އެކުލެވިފައި ވަނީ އެއްބަސްވެވުނު ގޮތަށް ކަމަށެވެ.
