ދިވެހިރާއްޖެއިން ސިޑްސްއަށް ވަކާލާތު ކުރުމުގައި އިސްނަގައިގެން ކުރާ މަސައްކަތަކަށް އިނގިރޭސިވިލާތުގެ މިނިސްޓާ އޮފް ސްޓޭޓް ފޮ ފޮރިން އެންޑް ކޮމަންވެލްތު އަދި ޑިޕާޓްމަންޓް އޮފް އެންވަޔަރަންމަންޓް، ރައިޓް އޮނަރަބްލް ލޯޑް ރިޗަޑް ބެންޔޯންއާ ތައުރީފުކުރައްވައިފިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އާއި މިނިސްޓާ އޮފް ސްޓޭޓް ލޯޑް ބެންޔޯން އެކު ބޭއްވި ބައްދަލުކުރެއްވުމުގައި ރައީސް ވަނީ ދެ ގައުމުގެ ދެމެދު އޮތް ގުޅުމާއި ބައިނަލްއަގްވާމީ ގުޅުންތަކުގެ މައްޗަށް، ހާއްސަކޮށް ސިޑްސް އާއި ގުޅުންހުރި މައްސަލަތަކުގެ މަޝްވަރާތައް ކުރައްވާފައެވެ.
މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި، މޫސުމަށް އަންނަ ބަދަލުތަކުން އަރައިގަތުމަށް ސަރުކާރުން ކުރައްވަމުން ގެންދަވާ މަސައްކަތްޕުޅުތަކުގެ މައްޗަށް އަލިއަޅުވާލެއްވިއެވެ. އަދި މޫސުމަށް އަންނަ ބަދަލުތަކުން އަރައިގަތުމަށް ސަރުކާރުން އަޅުއްވަމުން ގެންދަވާ ބައެއް ފިޔަވަޅުތަކުގެ މައްޗަށް ވެސް ރައީސް ވަނީ ވާހަކަފުޅު ދައްކަވާފައެވެ.
މިނިސްޓާ އޮފް ސްޓޭޓް ލޯޑް ބެންޔޯން ވަނީ ދިވެހިރާއްޖެއިން ސިޑްސްއަށް ވަކާލާތު ކުރުމުގައި އިސްނަގައިގެން ކުރާ މަސައްކަތަށާ، ދިވެހިރާއްޖޭގެ ތަރައްގީ އާއި ތަނަވަސްކަމަށް ރައީސް ގެންގުޅުއްވާ ވަރުގަދަ ތަސައްވުރަށް ތައުރީފުކުރައްވާފައެވެ.
