އެމްޑީޕީ ޕީޖީ ގްރޫޕްގެ މަގާމުތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެކަމާ ގުޅިގެން އެމްޑީޕީއިން ކުރި އިއުލާންގައި ބުނީ އެ ޕާޓީގެ ޕާލިމެންޓަރީ ގްރޫޕްގެ އިންތިހާބު މި މަހުގެ 28 ވަނަ ދުވަހު އޮންނާނެ ކަމަށާއި އެ އިންތިހާބުގައި ވާދަކުރުމަށް ހުޅުވާލާފައިވާ އަށް މަގާމަށް ކުރިމަތުލުމަށް މި މަހުގެ 27 ވަނަ ދުވަހުގެ 2 ޖެހުމާ ހަމައަށް ހުޅުވާލާފައިވާ ކަމަށެވެ.
އެ މަގާމުތަކަށް ކުރިމަތިލާން ބޭނުންވާ ބޭފުޅުން [email protected] އަށް އެކަން އެންގުމަށް އެމްޑީޕީއިން އެދެއެވެ.
ކުރިމަތިލުމަށް ހުޅުވާލާފައިވަނީ:
- ޕާލިމެންޓަރީ ގްރޫޕްގެ ލީޑަރު
- ޕާލިމެންޓަރީ ގްރޫޕްގެ ނައިބު ލީޑަރު
- ޕާލިމެންޓަރީ ގްރޫޕްގެ ނައިބު ލީޑަރު
- ސެކްރެޓަރީ ޖެނެރަލް
- ސެކްރެޓަރީ ޖެނެރަލް ގެ ނާއިބު
- ޗީފް ވިޕް
- ވިޕް
- ވިޕް
ނިމިދިޔަ 20 ވަނަ ރައްޔިތުންގެ އިންތިހާބުގައި އެމްޑީޕީއަށް ކާމިޔާބުކުރެވުނީ 12 ގޮނޑިއެވެ. އެންމެ ގިނަ ގޮނޑި ސަރުކާރު ހިންގާ ޕާޓީ، ޕީއެންސީއަށް ކާމިޔާބު ކުރެވުނުއިރު އެ ޕާޓީއަށް ކާމިޔާބު ކުރެވުނީ 66 ގޮނޑިއެވެ. އެހެންނަމަވެސް އަމިއްލަ ގޮތުން އިންތިހާބުވެވަޑައިގެންނެވި 11 ކެންޑިޑޭޓުންގެ ތެރެއިން 8 ކެންޑިޑޭޓަކު އޭގެ ފަހުން ޕީއެންސީއަށް ސޮއިކުރުމާ ގުޅިގެން އެ ޕާޓީގެ މެންބަރުންގެ އަދަދު ވަނީ 74 އަށް އަރާފައެވެ. އެއާއެކު އަމިއްލަ މެންބަރުންގެ އަދަދަކީ ތިނެކެވެ.
މި މެންބަރުންގެ އިތުރުން ޖުމްހޫރީ ޕާޓީގެ މެންބަރަކާއި އެމްޑީއޭގެ ދެ މެންބަރުންގެ އިތުރުން އެމްއެންޕީގެ މެންބަރަކު ވަނީ އިންތިހާބު ކާމިޔާބު ކޮށްފައެވެ.
