ވިޔަފާރި އާއި އިގްތިސޯދުގެ ދާއިރާގެ ގުޅުންތައް އިތުރަށް ބަދަހިކުރުމާ ގުޅޭ ގޮތުން އިކޮނޮމިކް މިނިސްޓަރު މުހައްމަދު ސައީދު، ޗައިނާގެ ޔުނާން ޕްރޮވިންސްގެ އިސް ބައެއް ބޭފުޅުންނާ މަޝްވަރާކުރައްވައިފިއެވެ.
މިނިސްޓަރާއި ޔުނާން ޕްރޮވިންޝަލް ޕީޕަލްސް ކޮންގްރެސްގެ ސްޓޭންޑިން ކޮމިޓީގެ ވައިސް ޗެއާމަން ލީ ޝިއޯސަންގެ މި ބައްދަލުވުމާ ގުޅޭ ގޮތުން އިކޮނޮމިކް މިނިސްޓްރީން ބުނީ، މި ބައްދަލުވުމުގެ ސަބަބުން ރާއްޖެ އާއި ޗައިނާގެ ޔުނާން ޕްރޮވިންސާ ދެމެދު ވިޔަފާރި އާއި އިގްތިސޯދުގެ ގުޅުންތައް އިތުރުވެގެން ދިއުމަށް މަގުފަހިވެގެން ދާނެ ކަމަށެވެ.
މި ބައްދަލުވުމުގައި ވިޔަފާރި އާއި އިގްތިސޯދުގެ އިތުރުން، ޗައިނާގެ ޔުނާން ޕްރޮވިންސްގެ ކުންމިންގައި ބާއްވާ ކުންމިން ފެއާގައި އިތުރު ފުރުސަތުތައް ހޯދުމާއި، ކުޅިވަރުގެ ދާއިރާއިން، ހާއްސަކޮށް ޓޭބަލް ޓެނިސް ކުޅޭ ދިވެހި އެތުލީޓުން ތަމްރީނުކުރުމާ ގުޅޭ ގޮތުން މަޝްވަރާކުރެވުނު ކަމަށް ވެސް، މިނިސްޓްރީން ބުނެއެވެ.
ސައީދު ވަނީ، ޔުނާން ޕްރޮވިންޝަލް ޕީޕަލްސް ކޮންގްރެސްގެ އިސް ބޭފުޅުންނަށް ޝުކުރު އަދާކުރައްވައި، ޗައިނާ އާއި ރާއްޖޭގެ ދެމެދު އޮންނަ ރަހުމަތްތެރިކަމުގެ ގުޅުން ވިޔަފާރީގެ ދާއިރާތަކުން އިތުރަށް ބަދަހިވެގެން ދިޔަކަން ފާހަގަކުރައްވައިފައެެވެ.
