ބޮލީވުޑްގެ ކާމިޔާބު އެކްޓަރު ސިދާތު މަލްހަތްރާ ލީޑު ރޯލުން ފެނިގެންދިޔަ ފިލްމު "ޔޯދާ" އެމެޒޯން ޕްރައިމުން ސްޓްރީމްކުރަން ފަށައިފިއެވެ.
ދަރުމާ ޕްރޮޑަކްޝަނުން ޕްރޮޑިއުސްކޮށްފައިވާ މި ފިލްމަކީ ސިނަމާތަކުގައި އެޅުވުމަށްފަހު ލިބުނު ކާމިޔާބީއަށް ބަލައި ޕްރައިމަށް ވިއްކާލި ފިލްމެކެވެ. މި ފިލްމަށް ބޮކްސް އޮފީހުގައިވަނީ 97 ކުރޯޑުގެ އާމްދަނީއެއް ލިބިފައެވެ. މި ފިލްމުގެ ލީޑު ރޯލުން ސިދާތު އާއެކު ފެނިގެންދާނީ ކާމިޔާބު ބަތަލާ ދިޝާ ޕާޓްނީ އާއި ރާޝީ ކަންނާއެވެ. ޔޯދާ އަކީ ސިދާތު އާއި ދިޝާ އެކުގައި ފެނިގެންދާ ފުރަތަމަ ފިލްމުވެސްމެއެވެ. ދަރްމާ ޕްރޮޑަކްޝަންގެ ފުރަތަމަ އޭރިއަލް އެކްޝަން ފްރެންޗައިޒް "ޔޯދާ" ގައި ސިދާތު ފެނިގެންދާނީ އާމީ އޮފިސަރެއްގެ ރޯލުންނެވެ. ފިލްމުގައިފެނިގެންދާނީ ޓެރަރިސްޓުން ތަކެއް އެއާކްރާފްޓެއް ހައިޖެކްކުރުމުން ދެން ކަންތައްތައް ވެގެންދާ ގޮތެވެ. މި ފިލްމަކީ މުޅިން އަލަށް ޑައިރެކްޝަނަން ނުކުންނަ ދެމީހަކު ޑައިރެކްޓްކުރާ ފިލްމެކެވެ. އެއީ ޕުޝްކަރު އާއި ސާގަރް އަމްބާއެވެ. ފިލްމު ޕްރޮޑިއުސްކުރާނީ ކަރަން ޖޯހަރު އަދި ޝަޝަންކް ކައިތާން އެވެ. މަނާލީގެ ހިތްގައިމު މާހައުލުގައި ޝޫޓްކޮށްފައިވާ މި ފިލްމަކީ ވަރުގަދަ އެކްޝަން މަންޒަރުތަކެއް ފެނިގެންދާނެ ފިލްމެކެވެ.
ދެހާސް ބާރަ ވަނަ އަހަރު ނުކުތް ފިލްމު "ސްޓޫޑަންޓް އޮފް ދަ އިޔާ" އިން ބޮލީވުޑަށް ތައާރަފްވީ ސިދާތް ވަނީ މީގެ ކުރިން ވެސް ކަރަން އާއެކު ގިނަ މަސައްކަތްތަކެއް ކޮށްފައެވެ. އޭގެ ތެރޭގައި "ހަސީ ތޯ ޕަސީ"، "ކަޕޫރު އެންޑް ސަންސް" އަދި "ޝޭރްޝާހް" އެވެ. ސިދާތު އަކީ މިހާރު ބޮލީވުޑްގައި އެންމެ ނަން މަޝްހޫރު އެކްޓަރުވެސްމެއެވެ.
