ފަލަސްތީނުގެ ގާޒާގައި ހަލުގައި ޖެހިފައިވާ ރައްޔިތުންނަށް އެހީ ހިފައިގެން ދިޔަ، އެހީގެ ގާފިލާއަކަށް އަމާޒުކޮށް އިޒްރޭލު ސިފައިން ދިން ހަމަލާ ކުށްވެރިކޮށް، ވަގުތުން ވަގުތަށް ހަމަލާ ހުއްޓާލުމަށް އެމްޑީޕީއިން ގޮވާލައިފިއެވެ.
ހައްދުފަހަނަޅާފައިވާ އިޒްރޭލުގެ ސިފައިން، އެހީގެ ގާފިލާތަކަށް އަމާޒުކޮށް ދިން ހަމަލާގައި ފަލަސްތީނުގެ 100 އަށްވުރެ ގިނަ މީހުން ވަނީ ޝަހީދުވެފައެވެ.
މި ހަމަލާއާއި ގުޅިގެން އެމްޑީޕީއިން މިއަދު ނެރުނު ބަޔާނުގައި ބުނީ އިޒްރޭލުން އިންސާނީ ހައްގުތަކާ ކަރާމާތަށް އަރައިގަނެ އަދި ބައިނަލްއަގްވާމީ ގާނޫނުތަކާވެސް ހިލާފުވެފައިވާކަމަށެވެ. އިޒްރޭލުން ބާރުގެ ބޭނުންކޮށްގެން އަދި އުދުވާނީ ހަމަލާތައް ދީގެން ފަލަސްތީނުގެ ރައްޔިތުން، އެތައް ހައްގަކުން މަހްރޫމްކުރަމުން ދާކަން ފާހަގަކޮށް އެ ބަޔާނުގައި ވަނީ ގާޒާގެ ރައްޔިތުންނަށް ބޭނުންވާ އަސާސީ ތަކެއްޗާއި އެހީ ހިފައިގެން ދާ އުޅަނދުތަކަށް އެ ސަރަހައްދަށް ވަނުމުގެ ހުއްދަ އިޒްރޭލުން ނުދޭކަމަށް ބުނެފައެވެ.
މިދިޔަ ޖެނުއަރީ މަހުއިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) އިން އިޒްރޭލުގެ މައްޗަށް ކޮށްފައިވާ ހުކުމާވެސް ހިލާފުވެފައިވާކަމަށް މި ބަޔާނުގައި ވަނީ ބުނެފައެވެ. މީގެ އިތުރުން އެ ބަޔާނުގައި ވަނީ މިހާތަނަށް ގާޒާއިން 30،000 އަށް ވުރެ ގިނަ މީހުން ޝަހީދުވެފައިވާކަމަށެވެ. އިޒްރޭލަށް ހަތިޔާރު ފޯރުކޮށްދޭ ގައުމުތަކުން އެކަން ހުއްޓާލުމަށް ގޮވާލަމުން އެމްޑީޕީ އިން ވަނީ އިޒްރޭލުގެ އަމަލުތައް ޖަވާބުދާރީ ކުރުވަން ޖެހޭކަމުގައި ބުނެފައެވެ.
މީގެ އިތުރުން އެމްޑީޕީގެ ބަޔާނުގައި ބުނެފައިވަނީ ކުރިއަށް އޮތީ ރަމަޟާން މަސްކަމަށާ އިޒްރޭލުން ފަލަސްތީނަށް ދޭ ހަމަލާތައް ދާއިމަށް ހުއްޓާލުން މިވަގުތަށް މުހިއްމުކަމަށެވެ.
