ވަކި ރަށެއްގައި ހުރީތީ އަމިއްލައަށް އާމްދަނީ ހޯދުމުގެ ދޮރު ބަންދުނުވާނެ ކަމަށާ އަމިއްލަ ރަށުގައި ތިބެގެން އުފައްދާ ތަކެތި ވިއްކައިގެން އާމްދަނީ ހޯދޭނެ މަގުފަހިކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ، "ރައީސްގެ ޖަވާބު" ސިލްސިލާގައި ކިނބިދޫ ދައިވަރަކު ކުރެއްވި ސުވާލަކަށް ޖަވާބު ދެއްވަމުންނެވެ. މިގޮތުން އެ ދަރިވަރު ވަނީ ތ. އަތޮޅަކީ ވަޒީފާތައް ހަނި އަތޮޅަކަށް ވާއިރު، އެ އަތޮޅު ވޭމަންޑޫން އޭލެވެލް ކިޔެވުމުގެ ފުރުސަތު އޮތް ނަމަވެސް މަތީ ތައުލީމު ހާސިލުކުރުމަށްފަހު ވަޒީފާއެއް ހޯދަން ޖެހެނީ މާލެ ބަދަލުވާންކަން ފާހަގަކޮށްފައެވެ.
ގްރޭޑް 10 ނިންމައި މަތީ ތައުލީމު ހާސިލުކުރުމަށްފަހު ރަށުގައި ހުރެ ވަޒީފާގެ ފުރުސަތު ފަހިވާނެގޮތެއް އޮތްތޯ ބުނެ އެ ދަރިވަރު ކުރި ސުވާލަށް ޖަވާބު ދެމުން ރައީސް ވިދާޅުވީ ތ.އަތޮޅުގައި އިގުތިސާދީ އަދި އާމްދަނީ ހޯދުމުގެ ފުރުސަތުތައް މަދުކަން ގަބޫލުފުޅުކުރައްވާ ކަމަށެވެ.
އެ އަތޮޅުގައި އޮތީ އެންމެ ރިސޯޓެއްކަން ފާހަގަކުރައްވަމުން ރައީސް ވިދާޅުވީ ވަޒީފާ ލިބޭނީ އިންޑަސްޓްރީތައް އެ އަތޮޅަށް ގެނެވިގެންކަމަށެވެ. މިގޮތުން އެކަން ކުރެވެން އޮތީ ޓޫރިޒަމް ފުޅާ ކުރެވި، އިތުރު ރިސޯޓުތައް ގެނެވި އަދި މަސްވެރިކަމުގެ އިތުރު ފުރުސަތުތައް ގެނެވިގެންކަމަށެވެ. އަދި ޒުވާން ކުދިންނަށް ބޭނުންވާނެ ކްރިއޭޓިވް އެކިކަހަލަ ފުރުސަތުތައް ހޯދައިދިނުމުގެ ގޮތުން ކޮންމެތާކު ހުރެގެންވެސް ކްރިއޭޓިން އިކޮނޮމީއެއް ގާއިމުކުރަން މަސައްކަތް ކުރަންޖެހޭކަމަށް ރައީސް ވިދާޅުވިއެވެ. "އޭރުން އެ ކުއްޖެއްގެ ޓެލެންޓް ބޭރުގެ މާކެޓުތަކަށްވެސް އޮންލައިން ވިޔަފާރީގެ ތެރެއިން ޕޭމެންޓް ގޭޓްވޭ ނިޒާމުގެ ތެރެއިން ކުރިއަށް ދެވިދާނެ. އެހެންކަމުން ހުންނަ ތަން މެޓާއެއްނުވާނެ އޭރަކުންނެއް، އެކަހަލަ ފުރުސަތުތައް ހޯދައިދޭންވެސް އެބަ މަސައްކަތްކުރަން" ރައީސް ވިދާޅުވިއެވެ.
މީގެއިތުރުން ރައީސް ވިދާޅުވީ އަމަލީ ގޮތުން ކޮންމެވެސް ކަހަލަ މަސައްކަތެއް ކުރަން ބޭނުންވާ ޒުވާން ކުދިންނަށްވެސް އެ އަތޮޅު ތެރޭގައި މަސައްކަތް ކުރުމުގެ ފުރުސަތު ހޯދައިދޭން އިގުތިސާދު ފުޅާކޮށްދޭން ވިސްނައިވަޑައިގެންފައިވާކަމަށެވެ.
