ސަރުކާރުން އެންމެ ބޮޑަށް އިސްކަންދެނީ ރާއްޖޭގައި އެހެން ގައުމެއްގެ ސިފައިން އެއްވެސް މިންވަރަކަށް ނުތިބޭނެކަން ޔަގީންކުރުމަށް ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އާންމުންގެ ސުވާލުތަކަށް އެމަނިކުފާނު ޖަވާބުދެއްވުމަށް ކުރިއަށްގެންދާ "ރައީސްގެ ޖަވާބު" ސިލްސިލާގައި ރާއްޖޭގައި ތިބި ބޭރު ސިފައިންގެ ކަންތައް ސަރުކާރުން ކުރިއަށްގެންދާ ގޮތާއި ގުޅޭގޮތުން މީހަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ އެކަމަކީ ރާއްޖޭގެ ހުރިހާ ރައްޔިތުންވެސް ބެލުމަށް ޝައުގުވެރިވާ ކަމެއްކަމަށެވެ.
މިގޮތުން ރާއްޖޭގައި ތިބި އިންޑިއާ ސިފައިން ރާއްޖެއިން ފޮނުވައިލުމުގެ މަސައްކަތް އެމަނިކުފާނު ވެރިކަމާ ހަވާލުވެވަޑައިގެންނެވި ފުރަތަމަ ދުވަހުގައި ރަސްމީކޮށް ފަށާފައިވާކަމަށް ރައީސް ވިދާޅުވިއެވެ. "މިހާރު ގޮސްފައިވާ ހިސާބުން އިރާދަކުރެއްވިއްޔާ މިފެށޭ މާޗު މަހުގެ 10 ވަނަ ދުވަހާ ހަމައަށް ދާއިރުގައި އެއް ޕްލެޓްފޯމުގެ ސިފައިން ގެންދާނެ. އަދި މެއި މަހުގެ 10 ގެ ކުރިން ދެންހުރި ޕްލެޓްފޯމުތަކުގެ ސިފައިން ގެންދާނެ." ރައީސް ވިދާޅުވިއެވެ.
މީގެއިތުރުން ރައީސް ވިދާޅުވީ މިކަން ހިނގަމުންދަނީ ޑިޕްލޮމެސީގެ މަތިވެރި އުސޫލުން މަޝްވަރާއާއި އެކު ކަމަށާއި އަދި މިކަން މިހިސާބަށް ގެންދެވުނީ ޑިޕްލޮމަސީގެ އުސޫލުން ކުރި މަސައްކަތުގެ ނަތީޖާއިންކަމަށެވެ. އިތުރަށް ރައީސް ވިދާޅުވީ ސިފައިން ފޮނުވައިލުމަށް ކުރާ މަސައްކަތުގެ ތެރެއިން ދެން ސަރުކާރުން ކުރާ މަސައްކަތަކީ ގާބިލުކަން އިތުރުކުރުން ކަމަށާ އެގޮތުން ވައިގެ މަގުން ބަލިމީހުން އުފުލުމުގެ ގާބިލުކަން އިތުރުކުރުމުގެ ގޮތުން މާޗު މަހުގެ ތެރޭގައި އެއާ އެމްބިއުލާންސްގެ ހިދުމަތް ފެށިގެންދާނެކަމަށެވެ.
ރާއްޖޭގެ އިގްތިސާދީ ސަރަހައްދަކީ ވަރަށް ބޮޑު ސަރަހައްދެެއްކަން ފާހަގަކޮށް ރައީސް ވިދާޅުވީ އެ ބޮޑު ސަރަހައްދު އަމިއްލައަށް ބެލެހެއްޓުމުގެ ގާބިލުކަން އިތުރުކުރުމަށް ވަރަށް ބާރަށް މަސައްކަތް ކުރިއަށްދާކަމަށެވެ.
