މާޗް މަހުގެ 15 ވަނަ ދުވަހުގެ ކުރިން އިންޑިއާ ސިފައިން ރާއްޖެއިން ބާލަން އަންގައިފިއެވެ.
އެކަން ހާމަކުރައްވާފައި ވަނީ މިހާރު ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި ޕްރިންސިޕަލް ސެކްރެޓަރީ ޓު ދަ ޕްރެޒިޑެންޓް އޮން ޕަބްލިކް ޕޮލިސީ އަބްދުﷲ ނާޒިމް އިބްރާހީމެވެ.
ރާއްޖޭގައި ތިބި އިންޑިއާ ސިފައިން ބޭލުމާ ގުޅޭ ގޮތުން ކެބިނެޓާ ހިއްސާކުރެވުނު އެންމެ ފަހުގެ މައުލޫމާތު ހިއްސާކުރައްވަމުން ނާޒިމް ވިދާޅުވީ ރާއްޖޭގައި ތިބި އިންޑިއާ ސިފައިން ފޮނުވާލުމުގެ މަސައްކަތް ރައީސް ޑރ. މުހައްމަދު މުއިއްޒު ރައީސްކަމުގެ ހުވާކުރެއްވި ފުރަތަމަ ދުވަހުން ބާރަށް ކުރިއަށްގެންދާ ކަމަށެވެ.
އެގޮތުން އެކަމާ ގުޅިގެން 11 ބައްދަލުވުމެއް ބާއްވާފައިވާ ކަމަށާއި މިހާރު ފޮރިން މިނިސްޓްރީގައި 12 ވަނަ ބައްދަލުވުން މިއަދު ހެނދުނު ފަށައިގެން ކުރިއަށްދާ ކަމަށް ނާޒިމް ވިދާޅުވިއެވެ. އަދި މިއަދުގެ ބައްދަލުވުމުގައި 15 މާޗުގެ ކުރިން އިންޑިއާ ސިފައިން މި ގައުމުން ބާލަން ހުށަހަޅާފައި ރައީސް ހުށަހަޅުއްވާފައިވާ ކަމަށް ނާޒިމް ވަނީ ވިދާޅުވެފައެވެ.
ނާޒިމް ވިދާޅުވީ އެ ބައްދަލުވުމުގައި އިންޑިއާގެ ސަފީރާއި ޖޮއިންޓް ސެކެޓްރީގެ އިތުރުން އިންޑިއާއިން ވަޑައިގެން އުޅުއްވާ އެހެނިހެން ބައެއް އިސް ފަރާތްތައްވެސް ބައިވެރިވަޑައިގަންނަވާ ކަމަށާއި ރާއްޖޭގެ ފަރާތުން ފޮރިން މިނިސްޓްރީގެ އިސް ބޭފުޅުންނާއި ރައީސް އޮފީހުގެ ބައެއް އިސް ފަރާތްތައް ވެސް އެ ބައްދަލުވުމުގައި ބައިވެރިވެވަޑައިގަންނަވާ ކަމަށެވެ.
