އިންތިހާބީ ރައީސް ޑރ. މުހައްމަދު މުއިއްޒުގެ ސަރުކާރުގައި ގައުމިއްޔަތާ ބެހޭ މިނިސްޓްރީ އެއް އުފައްދައި، އެ އިދާރާގެ މިނިސްޓަރަކަށް އާދަމް ނަސީރު އިބްރާހިމް ހަމަޖައްސަން ނިންމައިފިކަމުގެ މައުލޫމާތު ލިބިއްޖެއެވެ.

ރިޔާސީ އިންތިހާބުގެ ކެމްޕެއިންގައި ޑރ. މުއިއްޒު ވަނީ ދިވެހި ބަހާ އަދި އިސްލާމް މާއްދާއަށް އިސްކަންދިނުމުގެ ގޮތުން ދިވެހި ގައުމިއްޔަތު ދިރުވާ އާލާކުރުމަށް ހާއްސަ އިސްކަމެއް ދޭންޖެހޭކަން ފާހަގަކުރައްވާ އެކަމަށް މަސައްކަތް ކުރައްވާނެ ކަމަށް ވިދާޅުވެފައެވެ. އަދި އެމަނިކުފާނު ވެރިކަމުގައި ދިވެހި ބަހަށް އިސްކަންދެއްވައި، ގައުމުގެ ދެކެ ލޯބިވާ ޖީލެއް އުފައްދަން މަސައްކަތް ކުރައްވާނެ ކަމަށް ވެސް ވިދާޅުވިއެވެ.

މި މަހުގެ 17 ވަނަ ދުވަހު ހުވާކުރައްވާ ޑރ. މުއިއްޒުގެ ކެބިނެޓުގައި 22 މިނިސްޓަރުން ތިއްބަވާއިރު ކެބިނެޓު އެކުލަވާލުމުގައި އެންމެ ބޮޑު އިސްކަމެއް ދެއްވާފައި ވަނީ ތައުލީމީ ރޮނގުން އެންމެ ދަށްވެގެން ފުރަތަމަ ޑިގްރީ އޮތް ބޭފުޅުން އައްޔަން ކުރުން ކަމަށް ވެއެވެ. މީގެ އިތުރުން ދާއިރާއަކާ ގުޅޭ ނުވަތަ އެ ދާއިރާއަކުން ކިޔަވާ ވިދާޅުވެގެން ހުންނެވި ނުވަތަ އެ ދާއިރާއެއްގެ ތަޖުރިބާ ވީހާ ވެސް ރަނގަޅަށް ލިބިވަޑައިގެން ހުންނެވި ބޭފުޅަކު އައްޔަން ކުރެއްވުމަށް އިސްކަން ދެއްވާ ކަމަށް ވެސް މައުލޫމަތު ލިބެއެވެ.

މި ގޮތުން ބަލާއިރު އާދަމް ނަސީރު އަކީ މާލެ ސިޓީ ކައުންސިލްގެ އިދާރީ ކަންކަން ހަރުދަނާ ކުރުމަށް ކަނޑައަޅާފައި ވާ ކޮންސަލްޓެންޓުންގެ ތެރޭގައިވެސް ހިމެނޭ ބޭފުޅެކެވެ. އަދި އާދަމް ނަސީރު އަކީ ދިވެހި ބަހާއި ގައުމިއްޔަތު ދިރިވުމުގެ މަސައްކަތްތަކުގައި މިހާރުވެސް އުޅުއްވާ ބޭފުޅެކެވެ.

މީގެ އިތުރުން އާދަމް ނަސީރަކީ، ތަފާތު އެތައް މައުޟޫތަކަށް ޅެން ހައްދަވާ ބޭފުޅެއްވެސް މެއެވެ.

ހަބަރު ޑރ. މުހައްމަދު މުއިއްޒު