ގެދޮރުވެރިކަމާ ގުޅުންހުރި ކަންކަމުގައި ލިޔުމަކުން މި ސަރުކާރުން ދީފައިވާ އެއްޗެއް ރައްޔިތުންގެ އަތުން އަތުނުލާނެ ކަމަށާއި، ނަމަވެސް އުސޫލުން ބޭރުން ޝަރުތުހަމަނުވާ ފަރާތްތަކަށް ފްލެޓުތައް ދީފިނަމަ އާ ސަރުކާރުގައި ފިޔަވަޅު އަޅާނެ ކަމުގެ އިޝާރާތެއް ދީފިއެވެ.
ގެދޮރުވެރިޔާ ސްކީމްގެ ދަށުން ސަރުކާރުން ދޫކުރާ 4،000 ފްލެޓުތަކަށް ޝަރުތުހަމަވާ މީހުންގެ ލިސްޓު އާންމުކުރީ މިދިޔަ ހޮނިހިރު ދުވަހުގައެވެ. އެ ލިސްޓުގައިވާ ގޮތުން، ތިން ކޮޓަރީގެ ފްލެޓަށް ހުށަހެޅި މީހުންގެ ތެރެއިން ފްލެޓު ލިބެނީ 76 އިން ފެށިގެން މަތިން ޕޮއިންޓު ލިބުނު ފަރާތްތަކަށެވެ. އަދި ދެ ކޮޓަރީގެ ފްލެޓަށް ހުށަހެޅި މީހުންގެ ތެރެއިން ފްލެޓު ލިބެނީ 73 އިން ފެށިގެން މަތިން ޕޮއިންޓު ލިބިފައިވާ ފަރާތްތަކަށެވެ.
ނަމަވެސް ޕޮއިންޓު ދީފައިވާ ގޮތާ މެދު ހިތްހަމަނުޖެހި، ހައުސިން މިނިސްޓްރީ އަށް ގޮސް ގިނަ ބަޔަކު ވަނީ އިހްތިޖާޖުކޮށްފައެވެ. އެ ތަނުގައި ތިބި މީހުންނާ ބައްދަލުކުރައްވައި މިނިސްޓްރީގެ ޕާމަނަންޓް ސެކްރެޓަރީ ޒީނިޔާ އަހުމަދު އޭރު ވިދާޅުވީ، ޕޮއިންޓް ދީފައިވަނީ ފޯމުގައި ފުރިހަމަކޮށްފައި ހުރި މައުލޫމާތުތަކަށް ބެލުމަށްފަހު ކަމަށެވެ.
ގިނަ ބަޔެއްގެ ޝަކުވާތައް ހުރުމާއެކު އެ މިނިސްޓްރީން ވަނީ ފްލެޓުގެ ދާއިމީ ލިސްޓާ ގުޅިގެން ޝަކުވާ ހުށަހަޅަން ބޭނުންވާ ފަރާތްތަކަށް ވަނީ މިދިޔަ އާދީއްތަ ދުވަހުން ފެށިގެން އަންނަ ބުރާސްފަތި ދުވަހުގެ ހަވީރު 4 ޖަހަންދެން "ގެދޮރުވެރިން ޕޯޓަލް" މެދުވެރިކޮށް ޝަކުވާ ހުށަހެޅުމުގެ ފުރުސަތު ހުޅުވާލައިފައެވެ.
އިންތިހާބީ ރައީސް އޮފީހުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ތަރުޖަމާނު މުހައްމަދު ފިރުޒުލް ވިދާޅުވީ، 'ގެދޮރުވެރިޔާ'ގެ ދަށުން ފްލެޓު ލިބޭ މީހުންގެ ތެރެއިން ޝަރުތުހަމަވާ 13 ހާސް ފަރާތުގެ ލިސްޓެއް އެކުލަވާލައި، ފްލެޓު ދޫކުރުމުގެ މައްސަލައާ ގުޅޭ ގޮތުން އެ އޮފީހަށް ބައިވަރު ޝަކުވާ ލިބިފައިވާ ކަމަށެވެ. އޭނާ ވިދާޅުވީ، މައިގަނޑު ގޮތެއްގައި އެ އޮފީހަށް ޝަކުވާ ލިބިފައި ވަނީ ޕޮއިންޓު ދީފައިވާ ގޮތުންނާއި ލިސްޓު އެކުލަވާލުމުގެ މުޅި މަސައްކަތް ގެންދެވިފައިވާ ގޮތާއި ގުޅޭ ގޮތުންނެވެ.
އެހެންކަމުން ފިރުޒުލް ވަނީ މުއިއްޒު ދެ ކަމަކަށް އެދިވަޑައިގަންނަވާ ކަމަށް ވިދާޅުވެފައެވެ. އެއީ:
- އަވަސް އަރުވާލައިގެން މިހާ ކުރު މުއްދަތެއްގެ ތެރޭގައި ފްލެޓުތައް ނުދިނުމަށް
- އެ މަސައްކަތް އާ ސަރުކާރާ ހަވާލުކުރުމަށް
ފިރުޒުލް ވަނީ، ގެދޮރުވެރިކަމާއި އެހެނިހެން ކަންކަމާ ގުޅޭ ގޮތުން ރައްޔިތުންނަށް ސަރުކާރުން ލިޔުމަކުން އެއްވެސް އެއްޗެއް ދީފައިވާ ނަމަ، މުއިއްޒުގެ ސަރުކާރުގައި އެފަދަ އެއްވެސް އެއްޗެއް ނުނަންގަވާނެ ކަމަށް ވިދާޅުވާ ވިދާޅުވުން ތަކުރާރުކުރައްވައިފައެވެ. ނަމަވެސް ނުގަވައިދުން ކަންކަން ކުރާނަމަ އަޅާނުލާ ހުރުމަކީ އަދުލުވެރިގޮތެއް ނޫން ކަމަށާއި، އެހެންވީމާ ޝަރުތު ހަމަނުވާ ފަރާތްތަކަށް ފްލެޓުތައް ހަވާލުކޮށްފައިވާ ނަމަ ފިޔަވަޅު އެޅުމުގެ ފުރުސަތު އެބައޮތް ކަމަށް ވިދާޅުވިއެވެ. އޭނާ ވިދާޅުވީ، މި ކަން ކުރަނީ އެއްވެސް ސިޔާސީ ނިޔަތެއްގައި ނޫން ކަމަށެވެ.
"މިހެން ނުގަވައިދުން އިންސާފުން ބޭރުން ކަންތައްތައް ހިނގާފައިވާ ކަމަށްވާ ނަމަ، އެ ކަންކަމަށް ބަލައި އެ ކަންކަމުގެ ތެރޭގައި ހަމަ ހަގީގަތުގަ ވެސް އުސޫލުން ބޭރުން ކަންތައްތައް ހިނގާފައި ހުރިކަން ފާހަގަކުރެވޭ ނަމަ، އެ ފަރާތްތަކަކާ މެދު ފިޔަވަޅު އެޅުމުގެ ފުރުސަތު އޮންނާނެ ކަން ގާނޫނީ އިންތިޒާމުތަކުގެ ތެރެއިން އުފެދިފައި ހުރި މުއައްސަސާތަކުގެ ތެރެއިން ތަރުތީބުވެފަ ހުރި ތަރުތީބުގެ ތެރެއިން ފިޔަވަޅު އެޅުމުގެ ފުރުސަތު އޮންނާނެ ކަން ފާހަގަކުރަން ބޭނުން،" ފިރުޒުލް ވިދާޅުވިއެވެ.
އޭސީސީން ވަނީ، ފްލެޓް ލިބޭނެ 4،000 މީހުން ސަރުކާރުން ކަނޑައަޅައި، ފްލެޓު ލިބޭ މީހުންގެ ލިސްޓު އާންމުކޮށްފައި ވަނީ ޕޮއިންޓު ދިނުމުގެ އުސޫލާ ހިލާފަށް ޝަކުވާ ހުށަހެޅުމުގެ ފުރުސަތު ނުލިބޭހެން ވަކި ބަޔަކަށް ނާޒާއިޒު މަންފާ ހޯދައި ދިނުމުގެ ގޮތުން ކަމަށް ބުނެ ހުށަހަޅާފައިވާ މައްސަލައެއް ބަލަމުންދާ ކަމަށް މިދިޔަ އާދީއްތަ ދުވަހު ހާމަކޮށްފައެވެ. އެ މައްސަލައިގެ އޭސީސީގެ ޓީމަކުން ވަނީ ހައުސިން މިނިސްޓްރީ އަށް އިއްޔެ ގޮސް އެ ތަނުގައި ހަރަކާތްތެރިވެފައެވެ.
