'ދިވެހިންގެ ރާއްޖެ' ނަމުގައި މިއަދު ޕްރޮގްރެސިވް ކޯލިޝަނުން ސައިކަލު ބުރެއް ބޭއްވުމަށް ނިންމައިފިއެވެ.
މި ސައިކަލު ބުރު ފަށަން ހަމަޖެހިފައި ވަނީ މިއަދު ހަވީރު 3:45 ގައި ޕީޕީއެމް އޮފީސް ދޮރުމަތިންނެވެ. މި ހަރަކާތުގައި އިދިކޮޅުގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ރަނިންމޭޓު އަދި ރައްޔިތުންގެ މަޖިލީހުގެ ފަރެސްމާތޮޑާ ދާއިރާގެ މެންބަރު ހުސައިން މުހައްމަދު ލަތީފް (ސެންބެ) ބައިވެރިވެ ވަޑައިގަތުމަށް ވަނީ ހަމަޖެހިފައެވެ.
ރިޔާސީ އިންތިހާބުގެ ދެވަނަ ބުރުގެ އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހް އާއި ޕީއެންސީގެ ކެންޑިޑޭޓް ޑރ. މުހައްމަދު މުއިއްޒު ވާދަކުރައްވާ އިރު ދެ ޕާޓީންވެސް އަންނަނީ ވަރަށް ފޯރި އާއި އެކު ކެމްޕެއިން ކުރަމުންނެވެ. ރައީސް ސޯލިހްގެ ކެމްޕެއިންގެ މައިގަނޑު ފޯކަސްއެއް މިފަހަރު މާލެއަށް އަމާޒުވެފައިވާއިރު ޑރ.މުއިއްޒު ގެންދަވަނީ އަތޮޅު ތެރޭގެ ރަށްތަކުގައި ކެމްޕެއިން ހަރަކަތާތްތައް ހިންގަމުންނެވެ.
މި ގޮތުން މިއަދު ޑރ.މުއިއްޒު ދެކުނުގެ ބައެއް އަތޮޅުތަކަށް ވަޑައިގަތުމަށް ހަމަޖެހިފައިވާއިރު މިރޭ ފުވައްމުލައް ސިޓީއަށް ވަޑައިގަތުމަށް ވަނި ހަމަޖެހިފައެވެ. އަދި މާދަމާ އައްޑޫ ސިޓީއަށް ވަޑައިގަތުމަށް ހަމަޖެހިފައިވާ އިރު އެ ސިޓީގެ ކޮންމެ އަވަށެއްގައިވެސް ކެމްޕެއިން ހަރަކާތްތައް ކުރިއަށް ގެންދިއުމަށް ވަނީ ހަމަޖެހިފައެވެ.
