ރިޔާސީ އިންތިހާބުގެ ދެވަނަ ބުރުގައި ވޯޓުލެވޭ މީހުންގެ ދާއިމީ ލިސްޓް އިލެކްޝަންސް ކޮމިޝަން (އީސީ) އިން އާއްމުކޮށްފިއެވެ.
ރިޔާސީ އިންތިހާބުގެ ފުރަތަމަ ބުރުގައި ވޯޓުލުމުގެ ހައްގު 282,394 މީހުންނަށް ލިބުނުއިރު ދެވަނަ ބުރުގައި އަލަށް ވޯޓުލެވޭ 409 މީހުންނާއެކު ޖުމްލަ 282,804 މީހުންނަށް ވޯޓުލުމުގެ ހައްގު ލިބިގެންވެއެވެ.
ރިޔާސީ އިންތިހާބުގެ ފުރަތަމަ ބުރުގައި 224،786 މީހުން ވޯޓުލާފައިވާއިރު ދެވަނަ ބުރުގައި ވޯޓުލުމަށް 38،763 މީހުން ވަނީ ރީ-ރަޖިސްޓްރީ ކޮށްފައެވެ. އީސީ އިން ބުނީ ރީ-ރަޖިސްޓާ ކުރަން ހުށައެޅި ފޯމްތަކާ ގުޅޭގޮތުން އިލެކްޝަން ކޮމިޝަނުން ޝަކުވާ ހުށަހަޅަން ދިން 48 ގަޑިއިރުގެ މުއްދަތުގައި 361 ޝަކުވާ ހުށަހަޅާފައިވާ ކަމަށެވެ.
އީސީ އިން ވޯޓުލާ މީހުންގެ ދާއިމީ ލިސްޓު ނެރެފައިވާއިރު ދެވަނަ ބުރުގައި ރީ-ރަޖިސްޓްރީ ކުރުމަށް ހުށަހެޅި އަދަދު އިތުރު ވުމާ ގުޅިގެން ވޯޓުލުމަށް އިތުރު 12 ވޯޓު ފޮށި ވަނީ ބަހައްޓާފައެވެ. އަދި އިތުރުވި 12 ވޯޓު ފޮއްޓަށް އޮފިޝަލުން ހޯދުމަށް އީސީ އިން ވަނީ އިއުލާންކޮށްފައެވެ.
ރިޔާސީ އިންތިހާބުގެ ދެވަނަ ބުރުގައި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު އާއި އެމްޑީޕީގެ ކެންޑިޑޭޓް ރައީސް އިބްރާހީމް މުހައްމަދު ސޯލިހް ވާދަކުރައްވާއިރު އިންތިހާބުގެ ކަންތައްތައް ސުލްހަވެރިކަމާއެކު ކުރިއަށް ގެންދިއުމަށް އީސީ އާއި ކަމާބެހޭ އިދާރާތައް ގުޅިގެން އަންނަނީ މަސައްކަތްކުރަމުންނެވެ.
