އިންތިހާބު ވެވަޑއިގެންފި ނަމަ 5 އަހަރަށް ބަހާލައިގެން ހުރިހާ ފަރާތްތަކެއްގެ މުސާރައަށް ހެޔޮ ބަދަލުތަކެއް ގެނެސްދެއްވާނެ ކަމަށް ޕީއެންސީގެ ރިޔާސީ ކެންޑިޑޭޓު، މާލެ ސިޓީގެ މޭޔަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު ވިދާޅުވީ މުސާރައަށް ބަދަލު ގެންނަން ނިންމާވާފައި ވަނީ އެއްފަހަރާ ނޫން ކަމަށާއި މުސާރަ ބޮޑުކުރުމަށް ނިންމާފައި ވަނީ 5 އަހަރުގެ ދައުރަށް ބަހާލައިގެން 3 ފަހަރެއްގެ މަތިން ކަމަށެވެ.
ފުލުހުންނާއި ސިފައިން އަދި ދެންހުރި ޔުނީފޯމް ވަޒީފާތަކާއި، މިނިވަން މުއައްސަސާތަކުގެ އިތުރުން ސަރުކާރުގެ އެހެން އޮފީސް ތަކާއި ހުރިހާ ފަރާތްތަކުގެ މުސާރައަށް ވެސް 5 އަހަރަށް ބަހާލައިގެން އެކަށީގެންވާ ހެޔޮ ބަދަލެއް ގެނެސްދެއްވާނެ ކަމަށް މުއިއްޒު ވިދާޅުވިއެވެ.
ދިވެހިރާއްޖޭގެ އިގްތިސޯދު ވަރަށް ބޮޑަށް ރަނގަޅު ކުރަން ޖެހިފައިވާކަން ފާހަގަ ކުރައްވާ މުއިއްޒު ވިދާޅުވީ އާމްދަނީ އިތުރު ކުރެވިގެންދާ މިންވަރަކުން މުސާރަތަކަށް ހެޔޮ ބަދަލު ގެނެސްދެއްވާނެ ކަމަށެވެ.
އެހެންކަމުން މުއިއްޒަށް ވެރިކަން ލިބިވަޑައިގެންފިނަމަ ޔުނީފޯމް އިދާރާތައް ކަމަށް ވާ ކަރެކްޝަންސް ސާވިސް، އިމިގްރޭޝަން، ކަސްޓަމްސް ފަދަ ހުރިހާ ފަރާތްތަކާއި މިނިވަން މުއައްސަސާތަކުގެ އިތުރުން ސަރުކާރުގެ އެހެން އޮފީސް ތަކުގައި މަސައްކަތް ކުރާ ހުރިހާ ފަރާތްތަކުގެ މުސާރައަށް ހުށަހަޅާ އިކޮނޮމިކް ޕްލޭންއެއްގެ ތެރެއިން ހެޔޮ ބަދަލު ގެންނަވާނެ ކަމުގެ ޔަގީންކަން މުއިއްޒު ވަނީ ދެއްވާފައެވެ.
މީގެ ކުރިން ބޭއްވި ބައެއް ބައްދަލުވުންތަކުގައި ފުލުހުންނާއި ސިފައިންގެ މުސާރަ ދެގުނަ ކުރައްވާނެ ކަމަށް މުއިއްޒު ވިދާޅުވެފައި ވެއެވެ. އަދި އެހެން ދާއިރާތަކުގެ މުސާރަތައް ބޮޑު ކުރައްވާ ވާހަކަ ވިދާޅުވުމުން އެއީ، މިހާރުވެސް ދަރަނިވެފައި ވާ ބަޖެޓަށް އިތުރުވާ 223 ބިލިއަން ރުފިޔާ ކަމަށް ގިނަ ބަޔަކު ބުނަމުން ދަނިކޮށް، މުސާރަތަކަށް ހެޔޮ ބަދަލު ގެނެސްދެއްވާނެ ގޮތް މުއިއްޒު މިވަނީ ހާމަކޮށްދެއްވާފައެވެ.
ރިޔާސީ އިންތިހާބުގެ ދެވަނަ ބުރުގެ ވޯޓު ލުމަށް ހަފްތާއަކަށް ވެފައި ވާ އިރު، ދެވަނަ ބުރުގައި ވާދަ ކުރައްވާ 2 ކެންޑިޑޭޓުން [ޑރ. މުއިއްޒު އާއި ރައީސް އިބްރާހިމް މުހައްމަދު ސޯލިހު] ގެންދަވަނީ ގިނަ ދާއިރާތަކުން ބޮޑެތި ވައުދުތައް ވެވަޑައިގަންނަވަމުންނެވެ. މުއިއްޒު ވަޑައިގަންނަވާ ހުރިހާ ރަށެއްގައިހެން، ފަށާ ކުރިއަށް ނުގޮސް ހުރި މަސައްކަތްތައް ކުރިއަށް ގެންދެވުމަށާއި، ފެށި ނަމަވެސް ރަނގަޅަށް ކުރަމުން ނުދާ ކަންކަން ރަނގަޅު ކުރެއްވުމަށާއި، އެރަށެއްގެ ނިސްބަތުން އެރަކަށް ބޭނުންވާ ކަންކަން ކޮށްދެއްވާނެ ކަމަށް ވިދާޅުވަމުން ގެންދަވާ އިރު، ރައީސް ސޯލިހު ގެންދަވަނީ، މުސާރަތައް ބޮޑު ކުރައްވައި، އެލަވަންސްތައްވެސް އިތުރު ކުރައްވުން ފަދަ ގިނަ ވައުދުތަކެއް ވެވަޑައިގަންނަވަމުންނެވެ.
މިއިން ކޮންމެ ވައުދަކީ ފައިސާ އާ ގުޅިފައި ހުރި ވައުދުތަކަށް ވާއިރު، އިގުތިސޯދީ ނަޒަރަކުން ކަންކަން ކުރެވޭނެ ގޮތް ހާމަ ކޮށްދެއްވުމަށް ވެސް ކެންޑިޑޭޓުން މަސައްކަތް ކުރައްވައެވެ.
މުއިއްޒު އަކީ ވައުދު ކޮޕީކުރަމުން، ދާމީހެއް،ވަޢުވާކަން ނެއެގޭނެ!،އަނިޔާވެރިކަމާއި،ނާމާންކަން ރާއްޖެއަށް ،ގެނަސް ދެވިދާނެ،! ޔާމީނުގެ 5އަހަރުގައި،ރައްޔަތުން ނަފުސާނީގޮތުންބަލިކަށިވެފައި،ބިރުވެރި ޖަންގައްޔެއްގައި،އުޅުމުން އަބަދުވެސް ޖަލަށް ލާފާނޭ ކަމުގެ ބިރު ހީވެފައި،ނުބައިވަސްދުވާ ފޮޑިޔެއް ޖެހިއްޖެނަމަ ވެސް ޖަލުގެ ކުޑަގޮޅިއަށް ވައްދާ ދާނެކަމުގެ ބިރުގައި!