އައްޑޫގައި އައްސޭރި ޓޫރިޒަމް ތައާރަފުކޮށް، 6،000 ފަތުރުވެރިންގެ އެނދު ގާއިމު ކުރައްވާނެ ކަމަށް ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ، އައްޑޫ ސިޓީ ހިތަދޫގައި މިރޭ ބާއްވާ ކެމްޕެއިން ޖަލްސާގައި ވާހަކަ ދައްކަވަމުންނެވެ. މުއިއްޒު ވިދާޅުވީ، އައްޑޫގައި ޓޫރިޒަމް ތަރައްގީ ނުކޮށް ގިނަ ވަޒީފާ ފޯރުކޮށްދެވެން ނޯންނާނެ ކަމަށެވެ.
މިގޮތުން އައްސޭރި ޓޫރިޒަމްގެ ނަމުގައި މަޝްރޫއެއް އައްޑޫގައި ހިންގަވާނެ ކަމަށާއި ސަރުކާރުން ދެމެހެއްޓެނި ގޮތެއްގައި ކުރިޔަށް ގެންދެވޭ މަޝްރޫއަކަށް އެ ވިސްނުން ހަދައި، 6،000 އެނދު ގާއިމު ކުރައްވާނެ ކަމަށެވެ. އެއީ ގާތްގަނޑަކަށް 10،000 ވަޒީފާ ކަމަށް ވެސް މުއިއްޒު ފާހަގަ ކުރެއްވިއެވެ.
މީގެ އިތުރުން ރައީސް ޔާމީނުގެ ވެރިކަމުގައި އައްޑޫގައި ސީޕްލޭން ހަބެއް ގާއިމުކުރަން އައްޑޫ ފަޅު ފުންކުރުން ފަދަ ބައެއް މަސައްކަތްތައް ކޮށްފައިހުރި ނަމަވެސް މި ސަރުކާރުގައި އެ މަސައްކަތް ނުހިނގިކަން ފާހަގަ ކުރައްވާ މުއިއްޒު ވިދާޅުވީ، އައްސޭރި ޓޫއަރިޒަމް މަޝްރޫއާއެކު ސީހަބެއް އައްޑުއަށް އަންނާނެ ކަމަށެވެ.
އޭގެ ސަބަބުން ފައިދާ ކުރާނީ ހަމައެކަނި އައްޑޫ އަށް އެކަނި ނޫން ކަމަށާއި ދެކުނުގައި ހުރި ރިސޯޓުތަކަށް ވެސް އޭގެ ފައިދާ ކުރާނެ ކަމަށްވެސް މުއިއްޒު ވިދާޅުވި އެވެ.
މުއިއްޒު ވަނީ ހިތަދޫ އާއި ހުޅުމީދޫއާ ދެމެދު ބްރިޖެއް އަޅުއްވާނެ ކަމުގެ ވައުދު ތަކުރާރު ކުރައްވާފައެވެ. އަދި އެއީ ތަރައްގީގެ ކުރިމަގަށް އެޅޭ ފާލަމެއް ކަމަށާއި އެއީ ދެކޮޅު ޖެހޭ ސިޔާސަތެއްގެ ތެރެއިން ކުރެވޭ އިންވެސްޓްމަންޓެއް ކަމަށް ވެސް މުއިއްޒު ވިދާޅުވިއެވެ.
މުއިއްޒު ވިދާޅުވީ، މަސައްކަތްތައް ކުރިޔަށް ގެންދާނީ ކޮންމެ މަޝްރޫއަކުން ވެސް ރައްޔިތުންނަށް އޭގެ މަންފާއާއި ފައިދާ ކުރާ ގޮތަށް ކަމަށެވެ. އަދި ސަރުކާރު ހިންގާނީ ނަތީޖާ ނެރުމުގެ އަމާޒާ އެކު އެ ހިސާބު ޖަހައިގެން ކަމަށް ވެސް މުއިއްޒު ވިދާޅުވިއެވެ.
