ދަރިފުޅު ސުހާނާ ހާން 22، އާއެކު ފިލްމަކުން ޝާހްރުކް ހާން ފެންނާނެ ކަމަށް ބޮލީވުޑްގެ ރިޕޯޓްތައް ބުނެފިއެވެ.
ޕިންކްވިލާ އިން ބުނީ ޝާހް އާއި އޭނާގެ ދަރިފުޅު ސުހާނާ އެކުގައި ސްކްރީނުން ފެންނަން ހަމަޖެހިފައިވާ ކަމަށާއި މި ފިލްމު ވެގެންދާނީ ޝާހް އާއި ސުހާނާ އެކުގައި ކުޅޭ ފުރަތަމަ ފިލްމަށް ކަމަށެވެ. ފިލްމުގައި ވެސް ދެމީހުން ފެނިގެންދާނީ އަސްލު ދިރިއުޅުމެކޭ އެއްފަދައިން ދަރިފުޅާ ބައްޕަގެ ރޯލުންނެވެ. ދެޑް ޗިލީޒް އެންޓަޓައިންމަންޓާއި މާފްކްލިސް ކުންފުނި ގުޅިގެން އުފައްދާ މި ފިލްމު ޑައިރެކްޓްކުރާނީ ސިދާތު އާނަންދުއެވެ. ސިދާތު އަކީ އެކްޓަރު ޝާހްރުކްހާން އެންމެ ފަހުން ފެނިގެންދިޔަ ފިލްމު "ޕަތާން" ވެސް ގެނެސްދިން ޑައިރެކްޓަރެވެ. މި ފިލްމުގެ މާބޮޑު ތަފްސީލެއް ހާމަނުކުރިނަމަވެސް ރިޕޯޓްތައް ބުނާގޮތުގައި ފިލްމުގެ ސްކްރިޕްޓް އެއްކޮށް ނިމި ޝާހު އާއި ސުހާނާ އަށް ސްކްރިޕްޓް ހުށައެޅި ކަމަށެވެ. އަދި ދެމީހުންނަށްވެސް ފިލްމުގެ ސްކްރިޕްޓް ވަރަށް ކަމުދިޔަ ކަމަށެވެ. މި ފިލްމަކީ 2024 ވަނަ އަހަރު ސިނަމާތަކުގައި އަޅުވަން ނިންމާފައިވާ ފިލްމެކެވެ.
ރިޕޯޓްތައް ބުނާގޮތުގައި މި ފިލްމުގެ މަސައްކަތް ފަށާނީ ޝާހުގެ ކުރިއަށް އޮތް ފިލްމު "ދުންކީ" ގެ މަސައްކަތް އެއްކޮށް ނިމުމުންނެވެ. ސުހާނާ މިވަގުތު ތައްޔާރުވަމުން އަންނަނީ އޭނާގެ އަލަތު ފިލްމު "ދަ އާޗީސް" ގެ ޕްރޮމޯޝަން މަސައްކަތުގައެވެ. އަންނަ ނޮވެމްބަރު މަހު ނެޓްފްލިކްސް އިން ސްޓްރީމްކުރުމަށް ހަމަޖެހިފައިވާ މި ފިލްމަކީ ބޮލީވުޑްގެ މަޝްހޫރު މޫނުތަކުގެ ދަރިން ތައާރަފްވާ ފިލްމެކެވެ. ސުހާނާގެ އިތުރުން މި ފިލްމުން ފެނިގެންދާނެ ތަރިންނަކީ ސްރީދޭވީ ގެ ހަގު ދަރިފުޅު ހުޝީ ކަޕޫރު އާއި އަމީތާބް ބައްޗަންގެ ކާފަ ދަރިފުޅު އަގަސްޓިއާ ނަންދާއެވެ. މި ފިލްމަކީ ބޮލީވުޑްގެ މަޝްހޫރު ޑައިރެކްޓަރު ޒޯޔާ އަހްތަރުގެ ޑައިރެކްޝަނުގެ ދަށުން ގެނެސްދޭ ފިލްމެކެވެ. މި ފިލްމު ނެޓްފްލިކްސްގައި ސްޓްރީމްކުރާނީ އަންނަ ނޮވެމްބަރު މަހުގެ 23 ވަނަ ދުވަހުއެވެ.
