ބޮލީވުޑްގެ ކުޅަދާނަ ބަތަލާ ވިދްޔާ ބާލަން ލީޑު ރޯލުން ފެނިގެންދާ ފިލްމު "ނީޔަތު"ގެ ރަސްމީ ޓްރެއިލާ ދައްކާލައިފިއެވެ.
އަންނަ މަހުގެ ހަތް ވަނަ ދުވަހު ތިއޭޓާތަކުގައި އަޅުވަން ހަމަޖެހިފައިވާ މި ފިލްމުގައި ވިދްޔާ ފެނިގެންދާނީ ސެންޓްރަލް ބިއުރޯ އޮފް އިންވެސްޓިގޭޝަން (ސީބީއައި) ގެ އިންވެސްޓިގޭޓަރެއްގެ ރޯލުންނެވެ. އަނޫ މެނަން ޑައިރެކްޓްކޮށް ގެނެސްދޭ މި ފިލްމަކީ ކްރައިމް ތްރިލާ އެކެވެ. ފިލްމާ ގުޅޭގޮތުން ބަތަލާ ވިދްޔާ ބުނީ މި ފިލްމަކީ އޭނާ ކުޅުނު ފިލްމުތަކާ ތަފާތު ފިލްމެއް ކަމަށާއި މި ފިލްމުން ފެނިގެންދާނީ މީހަކު މަރުވުމުން އެމީހާގެ ގާތިލް ހޯދަން ކުރާ މަސައްކަތް ކަމަށެވެ. އަދި ބެލުންތެރިންނަށް ގާތިލް އަކީ ކާކުކަން ހާމަވެގެންދާއިރު، އެކަކަށްވެސް ފިލްމު ބަލަމުން ދާއިރު ގާތިލަކީ ކޮބައިކަން ދެނެނުގަނެވޭނެ ކަމަށެވެ. މަރުގެ ހަގީގަތް ހާމަވެގެންދާއިރު ފިލްމު ބަލަން ތިބޭ މީހުންގެ މޫނުމަތިން ހައިރާންކަން ފެނިގެންދާނެ ކަމަށްވެސް ބަތަލާ ވަނީ ބުނެފައެވެ.
ވިދްޔާ ބާލަން ލީޑު ރޯލު ކުޅޭ މި ފިލްމުގެ އިތުރު ކާސްޓުންނަކީ ރާހުލް ބޯސް، ނީރަޖް ކާބީ، ނިކީ ވާލިއާ، ޝަހާނާ ގޯސްވާމީ، އަމްރިތާ ޕޫރީ، ޑިޕަންނިތާ ޝަރްމާ، ޝަޝަންކް އަރޯރާ، ޕްރަޖަކްތާ ކޯލީ އަދި ދަނޭޝް ރަޒްވީއެވެ. ބޮޑު ކާސްޓަކާއެކު މި ފިލްމު ހަދާފައިވަނީ 6.6 މިލިއަން ޑޮލަރުގެ ބަޖެޓަކުންނެވެ. ބަތަލާ ވިދްޔާ ވަނީ މީގެ ކުރިންވެސް ޑައިރެކްޓަރު އަނޫ މެނަން އާއެކު މަސައްކަތްކޮށްފައެވެ. އެއީ "ޝަކުންތަލާ ދޭވީ" ގައެވެ. އެ ފިލްމުގައި ވިދްޔާ ކުޅުނު ރޯލަށް ކްރިޓީކުންގެ އިތުރުން ބެލުންތެރިންގެ ތަރުހީބު ލިބިގެންދިޔައެވެ.
