2001 ވަނަ އަހަރު ގެނެސްދިންު ކާމިޔާބު ފިލްމު "ގަދަރު: އޭކް ޕްރޭމް ކަތާ"ގެ ދެވަނަ ބައެއް 22 އަހަރު ފަހުން ގެނެސްދޭން ނިންމައިފިއެވެ.
ބޮލީވުޑްގެ ކާމިޔާބު އޮން ސްކްރީން ޖޯޑު ސަނީ ޑިއޯލް އާއި އަމީޝާ ޕަޓޭލް ލީޑު ރޯލުން ފެނިގެންދިޔަ މި ފިލްމުގެ ދެވަނަ ބައިން ދެތަރިންވެސް ފެނިގެންދާއިރު މިފަހަރުގެ ފިލްމުގައި ލީޑު ރޯލު ކުޅޭނީ ފިލްމުގައި ސަނީ (ތާރާ ސިންހް) އާއި އަމީޝާ (ސަކީނާ) ގެ ދަރިފުޅުގެ ރޯލު ކުޅުނު އުޓްކަރްޝް ޝަރުމާއެވެ. ޗައިލްޑް އާޓިސްޓް އެއްގެ ގޮތުގައި މި ފިލްމުން އުޓްކަރްޝް ފެނިގެންދިޔައިރު އޭނާ ކުޅުނު ރޯލަށް ގިނަ ބަޔަކު ވަނީ އޭރު ތައުރީފްކޮށްފައެވެ.
އިންޑިއާ ދެ ބައިވެ ޕާކިސްތާނު އުފެދުނު ދުވަސްވަރު އެ ދެ ގައުމަށް ނިސްބަތްވާ ދެމީހުންގެ މެދުގައި އުފެދުނު ލޯބީގެ ވާހަކައަކަށް ބިނާކޮށް ތައްޔާރުކޮށްފައިވާ ރީތި ފިލްމެކެވެ. އަނިލް ޝަރްމާ ޑައިރެކްޓްކޮށްފައިވާ މި ފިލްމުގެ ދެވަނަ ބައިވެސް ޑައިރެކްޓްކުރާނީ އަނިލް އެވެ. އަންނަ އޮގަސްޓް މަހުގެ 11 ވަނަ ދުވަހު ރިލީޒްކުރަން ހަމަޖެހިފައިވާ މި ފިލްމުގެ ޓްރެއިލާ ވެސް މިހާރު ވަނީ އާންމުކޮށްފައެވެ. ފިލްމުގެ ޓްރެއިލާއަށް ބޮޑު ތަރުހީބެއް ލިބެމުން އަންނަ އިރު ބެލުންތެރިން ތިބީ ފިލްމުގެ ދެވަނަ ބައެއް 22 އަހަރު ފަހުން ބަލައިލަން ލިބޭތީ ވަރަސް އުފަލުންނެވެ.
"ގަދަރު: އޭކް ޕްރޭމް ކަތާ" އަކީ އޭރު ބޮލީވުޑްގައި ނެރުނު އެންމެ މަގްބޫލު ފިލްމުތަކުގެ ތެރެއިން އެއް ފިލްމެވެ. 185 މިލިއަން އިންޑިއަން ރުޕީސްގެ ބަޖެޓަކުން އުފެއްދި މި ފިލްމަށް ބޮކްސް އޮފީހުގައި ވަނީ 1.33 ބިލިއަން އިންޑިއަން ރުޕީސްގެ އާމްދަނީއެއް ލިބިފައެވެ. މި ފިލްމުގެ ދެވަނަ ބައި އުފައްދާފައިވަނީ 500 މިލިއަން އިންޑިއަން ރުޕީސްގެ ބޮޑު ބަޖެޓަކުންނެވެ.
