ބޮލީވުޑްގައި މިހާތަނަށް އުފެދުނު އެންމެ މޮޅު އެއް ބަތަލާ ކާޖޮލް އޭނާގެ ސޯޝަލް މީޑިއާ އިން ބްރޭކެއް ނަގައިފިއެވެ.
ޓްވިޓާ އަދި އިންސްޓަގްރާމް މެދުވެރިކޮށް އިއްޔެ ކާޖޮލް ސޯޝަލް މީޑިއާ އިން ބްރޭކެއް ނަގާކަން އިއުލާންކުރަމުން ބުނީ މި ދުވަސްވަރަކީ އޭނާގެ ހަޔާތުގައި އެންމެ އުނދަގޫ ދުވަސްވަރު ކަމަށާއި އޭގެ ސަބަބުން ބްރޭކެއް ނަގަން ނިންމާފައިވާ ކަމަށެވެ. ގިނަ ފޭނުން ބުނީ ކާޖޮލް ސޯޝަލް މީޑިއާ އިން ބްރޭކެއް ނަގާކަން އިއުލާންކުރީ އޭނާގެ ކުރިއަށް އޮތް ޝޯ "ދަ ގުޑް ވައިފް" ޕްރޮމޯޓްކުރުމަށް ކަމަށެވެ.
ބަތަލާ އެންމެ އަވަހަށް ދެން ފެނިގެންދާނީ "ލަސްޓް ސްޓޯރީސް 2" އިންނެވެ. އަމިތް ރަވިންދަނާތު ޝަރްމާ ޑައިރެކްޓްކޮށް ގެނެސްދޭ މި ސީރީޒްގައި ކާޖޮލް އާއެކު ހަރަކާތްތެރިވާނީ ނީނާ ގުޕްތާ، ވިޖޭ ވަރްމާ، ތަމަންނާ ބާޓިއާ އަދި މުރްނާލް ތާކޫރްއެވެ. މި ސީރިޒްގެ ޓިޒާ އެއް ވެސް ދާދިފަހުން ވަނީ ރިލީޒްކޮށްފައެވެ. "ލަސްޓް ސްޓޯރީސް"ގެ ފުރަތަމަ ބަޔަށް އާންމުންގެ ވަރަށް ޕޮޒިޓިވް ކޮމެންޓް ލިބުނު އިރު ކްރިޓީކުން ވެސް ވަނީ އެ ޝޯ އަށް ތައުރީފްކޮށްފައެވެ.
1992 ވަނަ އަހަރު އުމުރުން 17 އަހަރުގައި އެކްޓިން ދާއިރާ އަށް ނުކުތް ކާޖޮލް އަކީ މިއަދުވެސް ގިނަ ބަޔަކަށް އެންމެ ކަމުދާ ބަތަލާއެވެ. އޭނާގެ ދިގު ފިލްމީ ކެރިއަރުގައި ވަނީ ގިނަ ހިޓް ފިލްމުތައް ކުޅެފައެވެ.
