ދިވެހި ރާއްޖެއަށް ވަގަށް ރަން އެތެރެކުރި މީހަކު 60،000 ރުފިޔާއިން ޖޫރިމަނާ ކޮށްފިއެވެ.
މި މައްސަލައާއި ގުޅިގެން ކްރިމިނަލް ކޯޓުން ހުކުން ކޮށްފައިވަނީ އިންޑިއާގެ ރައްޔިތެއްކަމަށްވާ ސުބެއިރު ޕަރަންމަލް ޕުތިއާގެ މައްޗަށެވެ.
ދައުލަތުން އޭނާގެ މައްޗަށް އުފުލާފައިވަނީ ސިއްރުން ދިވެހި ރާއްޖެއަށް މުދާ އެތެރެކުރި ކަމުގެ ދައުވާއެވެ. މި ދައުވާގައި ބުނެފައިވަނީ، ޝައްކު ކުރެވޭ ކަންތައްތަކެއް ހުރުމުން އޭނާ އައިޖީއެމްއެޗަށް ގެންގޮސް ބަލާފައިވާ ކަމަށެވެ. އެ ގޮތުންއޭނާގެ ބޮޑުކަމުދާތަކެތި ބަލައި ފާސްކުރިއިރު 361 ގްރާމް ރަން ހިމެނޭ ދެ ބުލެޓު ފެނިފައިވާ ކަމަށް ދައުލަތުން ވަނީ ބުނެފައެވެ.
މި ދައުވާއަށް އޭނާ އިއުތިރާފުވެފައިވާ އިރު ޝަރީއަތުން ވަނީ އޭނާގެ މައްޗަށް ދައުވާކޮށްފައިވާ ކުށުން އޭނާ ކުށްވެރިވެއްޖެކަމަށް ކަނޑައަޅާފައެވެ. މި ކުށުގެ އަދަބަކީ 6 މަސް ދުވަހާއި 2 އަހަރު ދުވަހުގެ މުއްދަތަކަށް ޖަލަށް ލުމެވެ. ނުވަތަ 10،000 ރުފިޔާއާއި، 240،000 ރުފިޔާއާ ދެމެދުގެ އަދަދަކަށް ޖޫރިމަނާ ކުރުމެވެ.
އެހެންކަމުން ކޯޓުން ވަނީ އޭނާގެ އިއުތިރާފަށް ރިއާޔަތްކޮށް 60،000 ރުފިޔާއިން ޖޫރިމަނާ ކޮށް އެ ފައިސާ 3 މަސް ދުވަސް ތެރޭގައި މީރާއަށް ދެއްކުމަށް ހުކުން ކޮށްފައެވެ.
ރާއްޖެއަށް، އިންޑިއާއިން ވަގަށް ރަން އެތެރެ ކުރާ މައްސަލަ އިތުރުވެފައިވާއިރު ދާދިފަހުންވެސް ރާއްޖެ އަށް ވަގަށް ރަން އެތެރެކުރި އިންޑިއާ މީހަކު ވަނީ 120،000 ރުފިޔާ އިން ޖޫރިމަނާ ކޮށްފައެވެ.
