ބޮލީވުޑްގެ ކާމިޔާބު ބަތަލާ ޕަރިނީތީ ޗޯޕްޅާ ކައިވެންޏެއް ތައްޔާރުވަމުން އަންނަ ކަމަށް ރިޕޯތްތައް ބުނެފިއެވެ.
މި މަހު 13 ވަނަ ދުވަހު ޕަރިނީތީ އާއި އޭނާގެ ލޯބިވެރިޔާ ރާގަވް ޗައްޑާ އެންގޭޖްކުރުމަށް ހަމަޖެހިފައިވާއިރު މި ހަފްލާ ވަރަށް ކުލަގަދަކޮށް ބާއްވަން ވަނީ ހަމަޖެހިފައެވެ. ޕަރިނީތީ އާއި ރާގަވް ލޯބީގެ ގޮތުން ގުޅިގެން އުޅޭކަން އެންމެ ފުރަތަމަ އަޑުއަރާފައިވަނީ މިދިޔަ މާޗު މަހު ރާގަވް އާއެކު ރޭގަނޑުގެ ކެއުމަކަށް ގޮސް އުޅެނިކޮށް ޕަޕަރާޒީން ނަގާފައިވާ ފޮޓޯތަކެއް އާންމުވުމާއި ގުޅިގެންނެވެ. އެކަމާ ގުޅިގެން ދެމީހުން ކުރެ އެކަކުވެސް ވާހަކަދައްކާފައިނުވާއިރު އޭގެ ފަހުން ދެމީހުންވެސް އެއްކޮށް މަގުމަތިން ފެނެއެވެ. ރާގަވް އަކީ އިންޑިއާގެ މަޖިލީހުގެ އެންމެ ޒުވާން މެންބަރުވެސްމެއެވެ.
ބަތަލާ ޕްރިޔަންކާ ޗޯޕްޅާގެ ދެބޭންގެ ދެދަރި ޕަރިނީތީ އާއި ރާގަވް އަކީ ވަރަށް ކުރީއްސުރެވެސް ގާތް ދެ އެކުވެރިންނެވެ. މިދެމީހުން ލަންޑަނުގައި އެއްކޮށް ކިޔަވަން އުޅުމުގެ ތެރޭގައި ދިމާވެ އެކުވެރިވިއެވެ. އަދި އެންމެފަހުން އެ ގުޅުން ލޯތްބަށް ބަދަލުވީއެވެ. ރާގަވް އަކީ އިންޑިއާގެ އާމް އާދްމީ ސިޔާސީ ޕާޓީގެ ފަރާތުން މަޖިލީހަށް ހޮވުނު މެންބަރެކެވެ. ރިޕޯޓްތައް ބުނާގޮތުގައި ރާގަވް އާއި ޕަރިނީތީ މި މަހު އެންގޭޖްކުރުމަށްފަހު އަވަސްވެގަންނާނީ ކައިވެނީގެ ތައްޔާރީތައް ވުމަށް ކަމަށާއި ދެމީހުންގެ ކައިވެނި މި އަހަރުތެރޭގައި ކުރެވިގެންދާނެ ކަމަށެވެ.
ދެހާސް އެގާރަ ވަނަ އަހަރު ފިލްމު "ލޭޑިސް ވާސަސް ރިކީ ބާލް" އިން ބޮލީވުޑަށް ތައާރަފްވި ބަތަލާ ޕަރިނީތީ ބޮލީވުޑްގައި އާންމުންގެ ލޯތްބާއި އިހުތިރާމް ހޯދާފައެވެ.
