68 އަށްވަނަ ފިލްމުފެއާ އެވޯޑްސްގެ އެންމެ މޮޅު ބަތަލާގެ އެވޯޑު ކުޅަދާނަ ބަތަލާ އާލިއާ ބަޓް އަށް ލިބިއްޖެއެވެ.
ބަތަލާ އާލިއާ މި އެވޯޑު ހާސިލްކުރީ އޭނާ ކުޅުނު ފިލްމު "ގަންގޫބާއީ ކަތިއަވާޅީ" ގައި އޭނާ ކުޅުނު ގަންގޫބާއިގެ ކެރެކްޓާ އިންނެވެ. އެ ފިލްމު ވަނީ ނިމިދިޔަ ފިލްމުފެއާ އެވޯޑު ހަފްލާގެ އެންމެ މޮޅު ފިލްމުގެ އެވޯޑުވެސް ލިބިފައެވެ. މި ފިލްމުން ވަނީ ޖުމްލަ 10 އެވޯޑު ލިބިފައެވެ. އޭގެ ތެރޭގައި އެންމެ މޮޅު ޑައިރެކްޓަރުގެ އެވޯޑު ސަންޖޭ ލީލާ ބަންސާލީ އަށް ލިބުނު އިރު އެންމެ މޮޅު ކޮރިއޮގްރަފީ އެވޯޑް، އެންމެ މޮޅު ޕްރޮޑަކްޝަން އެވޯޑު، އެންމެ މޮޅު ޑައިލޮގް، އެންމެ މޮޅު ސިނަމޮޓޮގްރަފީ، މޮޅު ކޮސްޓިއުމް ގެ އެވޯޑުވެސް ވަނީ މި ފިލްމަށް ލިބިފައެވެ.
ބުރާސްފަތި ދުވަހުގެ ރޭ ބޭއްވި މި އެވޯޑު ހަފްލާގައި އެންމެ މޮޅު އެކްޓަރުގެ މަގާމް ފިލްމު "ބަދާއި ދޯ" އިން ރާޖްކުމާރު ރާއޯ އަށް ލިބުނު އިރު އެ ފިލްމު ވަނީ އެންމެ މޮޅު ކްރިޓީކް ފިލްމުގެ އެވޯޑުވެސް ހޯދާފައެވެ. އަދި ކްރިޓީކުން ފާހަގަކުރާ ގޮތުގައި އެންމެ މޮޅު ބަތަލާގެ އެވޯޑު "ބޫލް ބުލައްޔާ 2" އިން ތައްބޫ އާއި ފިލްމު "ބަދާއި ދޯ" އިން ބޫމީ ޕެޑްނޭކަރު އަށް ވަނީ ލިބިފައެވެ. ހަމަ އެއާއެކު އެންމެ މޮޅު ސަޕޯޓިން އެކްޓަރަކަށް އަނިލް ކަޕޫރު ވަނީ ހޮވިފައެވެ.
އެވޯޑު ހަފްލާގެ އެންމެ ޝަރަފުވެރި އެވޯޑު ލައިފްޓައިމް އެޗީވްމަންޓް އެވޯޑު ލިބުނީ އެކްޓަރު ޕްރޭމް ޗޯޕްރާ އަށެވެ. 380 އަށްވުރެ ގިނަ ފިލްމުތަކުގައި އެކްޓްކުރި ކުޅަދާނަ އެކްޓަރު ޕްރޭމްގެ އެންމެ ފާހަގަކޮށްލެވޭ ފިލްމުތަކަކީ "ނަސީބް"، "ރާޖާ ބާބޫ"، "ވޯ ކޯން ތީ" އަދި "އަޖްނަބީ" އެވެ.
